د بشري حقونو سازمان: سوریه کې ۳۴۰ ملکیان وژل شوي
۱۴۰۳ اسفند ۱۸, شنبه
د بشري حقونو سازمان چې په سوریه کې جګړه څاري، د شنبې په ورځ (د ۲۰۲۵ کال د مارچ ۸مه) وویل چې د سوریې په ساحلي سیمه کې د وژل شوو کسانو شمیر ۵۰۰ ته رسیدلی دی. د سوریې د انتقالي ادارې ځواکونو او پرځول شوي رهبر بشارالاسد ته د وفادارو یاغیانو ترمنځ نښتې دوام لري.
په سوریه کې د بشارالاسد د رژیم له نسکوریدو دری میاشتې وروسته، دغه هیواد د شدیدو نښتو شاهد دی. فعالانو په وحشیانه ډول د ملکي کسانو د وژل کیدو خبر ورکړی دی.
د فعالانو په وینا، د شاوخوا دری میاشتې مخکې واک د تغیر راهیسې، د نوي حکومت د امنیتي ځواکونو د شدیدو نښتو په پایله کې لږ تر لږه ۳۴۰ تنه ملکیان وژل شوي دي.
د سوریې د بشري حقونو سازمان رپوټ ورکړی دی چې یوازې د بانیاس په ښار کې ۶۰ کسان په ډزو وژل شوي دي.
نوموړي سازمان چې مقر یې په بریتانیا کې دی او د خبر رسوونکو شبکو له لارې د سوریې وضعیت څاري د لاذقیه، طرطوس او حماه ولایتونو په ۲۱ سیمو کې د قتل عام خبره کړې ده.
د سوریې په لویدیځ کې دغه ساحلي سیمې د علویانو مستحکم مرکزونه ګڼل کیږي، هغه مذهبي ټولنه چې پروزل شوی ولسمشر بشارالاسد هم ورپورې تعلق لري.
د سوریې د نوي ادارې چارواکو د پنجشنبې په ورځ د بشارالاسد پرځول شوي حکومت پورې اړوندو ملیشه و له خوا وروسته له مرګونو کمینونو څخه، د تازه شورشونو سرکوبه کول پیل کړي دي.
د سوریې یوه اوسني امنیتي چارواکي ویلي دي چې له یاغیانو سره د شدیدو نښتو په پایله کې لسګونه امنیتي ځواکونه وژل شوي دي.