د آلمان په یوه روغتون کې اورلګېدنې مرګ ژوبله اړولې
۱۴۰۴ خرداد ۱۱, یکشنبه
رپوټونه وايي تر اورلګېدنې لږ وروسته اورژونکي د پېښې ځای ته ورسېدل او د شل دقیقو په جریان کې ېې اور مړ کړ.
آلماني چارواکو ويلي چې دغه اورلګېدنه نیمه شپه د هامبورګ ښار په مرین کرانکین هاوس یا مرین روغتون کې رامنځ ته شوه.
پر وینا ېې اور د ساختمان د ځمکې د سر په پوړ کې د پاخه عمر لرونکو افرادو د ېوې کوټې په منځ کې لګېدلی و چې لمبې ېې تر پاسني پوړ او لوګی ېې تر څلورم پوړ پورې خپور شو.
په سملاسي توګه د اورلګېدنې لامل روښانه نه دی.
د اوروژنې ادارې د آلمان خبري آژانس ته وویل چې په دغه پېښه کې درې د پاخه عمر ناروغان مړه شوي او له ۵۰ ډېر کسان ټپیان شوي دي. د ټپیانو له ډلې ۲ تنه ېې په مرګ ګواښوونکي وضعیت کې ښودل شوي، د ۱۶ تنو ټپیونه شدید دي او پاتې ۶۳ نور سطحي ژوبل دي.
چارواکي اړ شول چې د روغتون یوه برخه تخلیه کړي. په پېښه کې ټپی شوي کسان د همدې روغتون اړوند یوه نژدې کلینک کې تر درملنې لاندې نيول شوي دي.