په پاریس ښار کې د ايران سفارت مخې ته د افغانانو لاریون

د افغانانو له خوا په پاریس ښار کې د شنبې ورځې لاريون د فرانسې پولیسو سره په همغږۍ په لاره واچول شو.

امرالله صافي (په انځور کې وينا وال)دويچه ويله ته وويل چې د فرانسې پولیسو ورسره ومنله چې افغانان دې د ايران سفارت مخې ته لاريون وکړي. لاريون د شنبې په ورځ (د جون ۲۰مه) ماسپښين ۳ بجې پيل او ۶ بجې پای ته ورسيد.

د لاريون په پریکړه ليک کې ويل شوي دي چې د شنبې په لاريون کې نژدې ۱۰۰ کسانو ګډون کړی وو.

په پاريس کې د ایران سفارت مخې ته راټولو شوو افغان اعتراض کونکو خپل اعتراض د غمجن ساز په غږولو پیل کړ. لاريون په ځايي وخت د ماسپښين په درو بجو پيل او په ۶ بجو پای ته ورسيد.

د لاريون ګډونوالو په ايران کې د وژل شوو افغان کډوالو له کورنيو سره خپله غمشريکي وښوده او د قربانيانو په درناوي يې د دوو دقیقو له پاره چوپتيا اختيار کړه.

د افغانستان ملي سرود هم وغږول شو. افغان لاريون کونکي يې د اوريدو او درناوي په حال کې ليدل کيږي.

لاريون کونکي وايي، کوم زورزياتی چې ايراني پولیس له افغان کډوالو سره کوي، بيلګې يې په تمثيلي شکل د ايران سفارت مخې ته اجرا کړې.

د تياتر يوه بله برخه. پاریس میشته افغانان وايي چې ايراني پولیس د افغانانو د نيولو پر مهال له هغوي سره دغه ډول چلند کوي لکه څنګه چې په انځور کې دوی تمثیل کړی دی.

په دغه انځور کې د افغان کډوالو د تياتر لس کسيزه ډله ښکاري چې د لاریون پر مهال يې تمثيلي ټوټې اجرا کړې.

د شنبې ورځې په لاريون کې نورو ګڼ شمير بهرنيانو هم ګډون کړی وو. يو فرانسوی چې د امرالله صافي په خبره د يو مهاجرپلوه سازمان غړی دی، د وینا کوي.

د ایران سفارت مخې ته راټولو شوو لاریون کونکو پر بشري سازمانونو هم غږ وکړ چې د افغان مهاجرینو د حقوقو ځانګړي پلټنه پیل کړي او د هغوی ټول انساني حقوق خوندي کړي.

د لاريون کونکو له خوا د خپور شوي پریکړه ليک په يوه برخه کې راغلي: »فرانسه مېشت افغان ځوانان د بهر میشتو مختلفو افغانانو په استازیتوب میدان ته را وتلي یو او هیڅ ډول مذهبی، قومي یا ژبنیز تعصبات او توپیرونه زمونږ منځ کې شتون نه لري. مونږ ټول یو واحد افغان ملت یو او همداسې به متحد پاتې کیږو.»

افغان لاريون کونکي وايي: »مونږ د ایران د دولت او ولس نه غوښتنه کوو چې د افغان مجبوره مهاجر وګړو سره د نړیوالو قوانینو، د انسانیت او اسلامیت په رڼا کي چلند وکړي.» دوی وايي چې لاريون ته ځينې رسنۍ هم راغلې وې.

په پریکړه ليک کې دا هم راغلي، چې ایران باید سيند ته د غورځول شوو ۵۷ تنو افغان مهاجرو او تر هغې وروسته په یوه موټر کې د څو تنو افغانانو د سوخولو اصلي عاملان محاکمه کړي.

د لاريون د مسئولينو په خبره، په پاریس ښار کې د ایران سفارت مخې ته د افغانانو لاریون په سوليزه توګه ترسره شو. په پاریس کې د افغانانو مرکزي ټولنه وايي که يې غږ وانه وريدل شي، دوی به خپلو دغه ډول لاريونونو ته ادامه ورکوي. چمتو کونکی: محمد کریم صالح/ ن.ص