په امریکا کي هره ورځ ۱۰۰ تنه په وسلو وژل کیږي
۱۳۹۸ شهریور ۲۲, جمعه
د ۱۴۵ امریکايي کمپنیو رئیسانو په یوه خط کي لیکلي دي: «د امریکا د وسلو تشدد د بحران په مقابل کي عکس العمل نه کول د منلو وړ نه دی». دغه لیک چي په نیویارک ټایمز کي نشر سوی دی، د نورو تر څنگ د لیوي سټراوس،گېپ، یوبر، تویتر او نورو کمپنيو د رئیسانو له خوا امضأ سوی دی. په دې ډول سره نو د اول وار له پاره د امریکا اقتصادي او معاملاتي نړۍ هم د وسلو قانون د سختولو په بحثونو کي ورگډه سول.
د هغوی په لیک کي راغلي دي: «اوس ددې وخت رارسیدلئ دی چي اقتصادي شرکتونه د عامه ذهنیت څنگ ته ودریږي او د وسلو د استعمال په اړه د لا ډیر امنیت غوښتنه وکړي.»
رئیسانو په دې ارتباط دې ته اشاره کړې ده، چي د امريکا په متحده ايالاتو کي هره ورځ ۱۰۰ تنه په وسلو باندي په قتل رسیږي. د هغوی په خبره د وسلو په واسطه تشدد ختمیدلای سي او سنأ باید په دې کي مهم رول ادأ کړي.
د وسلو رانیونکي باید امتحان سي
په مشخص ډول له سناتورانو څخه غوښتل سوي دي، داسي یو قانون په تصویب ورسوي، چي د هري وسلې د رانیولو پر وخت د هغه د رانیونکو امتحانول په نظر کي ونیول سي.
دغه ډول یو قانون د امریکا په نمایندگانو مجلس کي وختي لا تصویب سوی دی، خو په سنا کي اکثریت جمهوري غوښتونکو له خوا تحریم سوی دی. د میچ میک کونېل په مشرۍ جمهوري غوښتونکی اکثریت مگرغواړي،دغه قاون یوازي هغه وخت تصویب کړي، چي که هغه د جمهوررئيس دونالد ترمپ له خوا حمایه سي.
خو ترمپ چي په تکرار سره د امریکا د وسلو د قدرت مند لابي- NRA د ملگري په حیث راڅرگندیږي، تر اوسه پوري یې په دې هکله واضح موقف نه دی نیولی.
د نمایندگانو مجلس ویاندي نېنسي پیلوسي پر میچ میک کونېل باندي تور لگولی دی، چي د خپل ځنډولو په سیاست سره د ډیرو خلگو ژوند له خطر سره مخامخ کوي. دې پرون پنجشنبه(د سپټمبر ۱۲ مه) په واشنگټن کي وویل، چي که دغه قانون وختي نافذ سوی وای، نو اوس به د ډیرو خلگو ژوند ژغورل سوی وای.
په تیرو میاشتو کي د وسلو د خرڅلاو او تجارت د سختولو په هکله قانون پر سر بحثونه هغه وخت بیا تاوده سول، کله چي د تکزاس د اېل پاسو په یوه لوی مارکيټ،وال مارت او اوهایو ایالت په دایتون کي د یوې ورځي په جریان کي ۳۱ انسانان په قتل ورسیدل.
تر دې پيښي وروسته وال مارت غوښتنه وکړه، چي یوازي دي بې وسلې کسان مغازې ته د ورننوتلو اجازه ولري. خو د هغوی په مقابل کي بیا مشتریانو اعتراضونه وکړل.
د اگست میاشتي په اخره کي یوه متکرر مجرم د تکزاس په اودیسه کي اوه انسانان په قتل ورسول، چي دی پخپله بیا د پولیسو له خوا وویشتل سو.
زموږ د آرشیف څخه یو انځوریز البوم:( 14.03.2018)