په اروپا کې د سختي گرمۍ څپه

په آلمان کې د گرمۍ سختې څپې ډیر خلک له روغتيايي ستونزو سره لاس او گريوان کړي دي. سهار وختي د تودوخې درجه د ۱۸ او ۲۱ درجو ترمنځ وي، خو د سهار له لسو بجو څخه بيا د تودوخې درجه د آلمان په لويديځ کې تر ۳۰ درجو رسيږي.

د شنبې او يکشنبې په ورځو د آلمان په ځينو برخو کې گرمي تر ۳۸ سانتې گرادو اوښتې وه. د دې خبرې په پام کې نيولو سره چې ډير آلمانان د دوبي په رخصتيو کې دي او ځيني خارجي سيالانيان هم د يو څه محدوديتونو سره سفر کوي، چارواکو انديښنه څرگنده کړې وه چې د جهيلونو او اوبو پر غاړو راټوليدونکي خلک به ټولنیز واټن مراعت نه کړي. خو په آلمان کې په حوضونو او جهيلونو کې د خلکو بيروبار هغه کم وو چې تمه یي کيده.

د تودوخې دا ډول لوړه درجه او د باران نه شتون په دې معنا دي چې په ټول آلمان کې د اور لگيدنې خطر موجود دی. خو پر دې سربيره هم خلک له موقع څخه په گټي سره په پارکونو کې کباب کوي. تر دې د مخه خبرداری ورکړل شوی چې ښايي د هېواد ځيني برخې د طوفان شاهدې واوسي.

د بريتانيا په ځينو برخو کې د تودوجې درجه تر ۳۶ سانتي گرادو لوړه شوې ده چې په دې توگه دا په تیرو شلو کلونو کې د اگست تر ټولو گرمه مياشت ده. د کرونا پېښې هم په دې هېواد کې چې د اروپا د هر بل هېواد په پرتله ډېر کرونا ځپلې دی، اوس هم ډېرې دي، خو خلک سربیره پر دې هم ځانونه ساحلي تفريحي ځايونو ته رسوي.

په بيلجيم کې د آلمان په گډون د اروپا د ډېرو هېوادونو له پاره د سفر خبرداري اوس هم موجود دي. د سفر دغه محدوديت په آنتورپ ولايت کې د کرونا د مثبتو پېښو تر لوړيدو وروسته وضع کړل شوی وو. د بيلجيم وگړو هم له موقع څخه په استفادې سره د اروپا د نورو وگړو په څېر ساحلونو ته مخه کړې ده.

تر هغه وروسته چې په پاريس کې د ټولو له پاره ماسک کارول اجباري شول، حکومت د گرمۍ څخه د خبرداري سيسټم هم ځای پر ځای کړ. له سيالانيانو غوښتنه شوې چې د گرمۍ پر سختې څپې سربیره هم ماسک وکاروي او د ټولنیز واټن مقررات دې پر ځای کړي.

په آلمان کې د شليسوک هولشتاين ایالت چارواکو ساحل ته پر تلونکو د فاصلې د مراعتولو غږ کړی دی. زياتره یې ويره لري چې په ساحلونو کې به ازدهام ډېر شي. په آلمان کې د ښوونځيو د دوبي رخصتي مخ پر ختميدو دي او کورنۍ له دې فرصت څخه د تفريح او د بالتيک ساحل ته د تلو له پاره استفاده کوي.