«په آلمان کې به د ښوونکو کمبود ښایي راغلي مهاجر پوره کړي»
۱۳۹۸ آذر ۱۴, پنجشنبه
په هغه لیکنه کې چې د آلمان خبري آژانس »ډي پي ای« ته رسېدلې، راغلی چې د آزاد دیموکرات گوند FDP د فدرال او ایالتونو ترمنځ د داسې هوکړه لیک غوښتنه کوي چې له مخې یې باید د هغو، یو کلني کورسونو مالي ملاتړ وسي، چې له مخې یې مهاجرو ښوونکو ته د دې زمینه برابره کړي چې د هیواد تعلیمی سیستم ته د ننوتو له پاره شرایط پوره کړای سي. دغه ډول مالي ملاتړ باید د درو کلونو له پاره وي او فدرال او ایالتونه باید دغه پیسې په خپل منځ کې سره وویشي.
د آلمان د کډوالو او مهاجرت ادارې د احصاییو له مخې ښایي د هغو ښوونکو او استادانو شمیر چې عملي او یا هم نظري تجربه لري ،۵۰۰۰ ته ورسیږي چې له ۲۰۱۴ کال راهیسي آلمان ته راغلي دي.
د آلمان د کار د ادارې په حواله د دغه هیواد تعلیمي سیستم ته د مهاجرو ښوونکو ورننوتل ډیر سخت دي. تر اوسه پوری یوازی ۲۵۰ تنه هغه کسان چې د پناه غوښتنه یې منل سوې، په عادي او یا هم مسلکي مکتبونو کې په رسمي توگه په دندو گمارل شوي دي.
د ښوونکو د کمبود په هکله نن پنجشنبه او سبا جمعه (د دسمبر ۵ او ۶ نیټه) په برلین کې د آلمان د ایالتونو د کلتور وزارتونه د یوه کنفرانس په ترڅ کې سلامشورې کوي. په غونډه کې د ښوونکو د گومارلو اړتیا او په دې برخه کې د موجوده امکاناتو څخه د استفادې په هکله خبرې وشي.
په آلمان کې د ښوونکو اتحادیې لا په دوبي کې خبرداری ورکړی وو چې په سږني تعلیمي کال کې به د شا او خوا ۱۵ زره ښوونکو ځایونه خالي وي.
G.P/B.S/dpa