په آلمان کي د میلیونرانو شمیر په ښکاره ډول ډیر سوی
۱۳۹۹ تیر ۲۰, جمعه
فرانسې خبري آژانس د «نړۍ د شتمنیو رپوټ» په حواله چي د کاپژمیني مشورتي شرکت له خوا جوړ سوی، رپوټ ورکړی دی چي په آلمان کي د هغو کسانو شمیر چي تر یو میلیون ډالرو پوري د پانگه اچوني له پاره په اختیار کي لري، یو میلیون او ۴۶۶کسانو ته رسیږي.
د « نړۍ د شتمنیو رپوټ» پر اساس په ټوله نړۍ کی هم د میلیونرانو شمیر ۸،۸ سلنه ته لوړ سوی. ددغه رپوټ له مخي د ۱۹ اشاریه ۶ میلیونو کسانو سرمایه چي میلیونران دي، ۷۴ بیلیون ډالرو ته رسیږي.
د دغو پلټنو له مخي آلمان په ۲۰۱۹م کال کي په ټوله نړۍ کي د ډیرو میلیونرانو په درلودو سره پنځم ځای خپل کړی.
امریکا متحده ایالات د ډیرو میلیونرانو په درلودلو سره په لومړي کتار کي راځي چي ورپسې جاپان، چین او فرانسې هیوادونو تر ټولو زیات میلیونران درلودل.
د دغه رپوټ په حواله په مجموعي ډول په آلمان، امریکا متحده ایالاتو، جاپان، چین او فرانسه کي میلیونران د ټولي نړۍ د میلیونرانو ۶۱ اشاریه ۶ سلنه جوړوي.
نوي سلنه میلیونران یعني ۱۷ ميليونه او ۷۰۰زره کسان له یوه څخه تر میلیونو پوري امریکايي ډالر لري. په داسي حال کي چي یو اشاریه ۸ میلیونه نور کسان بیا چي د میلیونرانو ۹ سلنه جوړوي، هر یو يې له ۵ څخه تر۳۰ میلیون ډالرو پوري د پانگه اچوني له پاره لري.
په نړۍ کي شاوخوا ۱۸۳۴۰۰ کسان چي »اولترامیلیونران« دي هر یو څه د پاسه ۳۰ میلیون ډالر شتمني د پانگوني له پاره لري.
د دغو پلټنو له پاره د نوموړو هیوادونو د ارقامو د ادارې اطلاعات، د پیسو د نړیوال صندوق اطلاعات او همدارنگه د نړیوال بانک اطلاعات تر ارزوني لاندي نیول سوي او دغه پلټنه د همدغو اطلاعاتو پر اساس رامنځته سوې ده.