پاکستان ټرمپ د ۲۰۲۶ کال د نوبل سولې جایزې له پاره نومولی
۱۴۰۴ خرداد ۳۱, شنبه
د پاکستان حکومت اعلان کړی چې د امریکا متحده ایالاتو ولسمشر ډونالډ ټرمپ به د ۲۰۲۶ نوبل سولې جایزې ته نوماند کړي. د پاکستان د حکومت دا پریکړه وروسته له هغه شوې چې نوموړي د هند او پاکستان ترمنځ روان تاوتریخوالي کې د پریکړنده دیپلوماتیکې مداخلې له لارې یې په اتومي وسلو سمبالو د داړو ګاونډیو هیوادونو ترمنځ د یو احتمالي جنګ مخه ونیوله.
د پاکستان حکومت پر ټولنیزې شبکې پخوانی ټویټر باندې خپره شوې اعلامیه کې ویل شوي، ټرمپ د ستراتیژیک لید، مشرتابه او فعالو ډیپلوماټیکو هڅو له لارې سیمه له یوه خطرناک بحران څخه وژغورله.
په اعلامیه کې زیاته شوې: «د هغه رول یو ریښتینی سوله ساتونکی او د خبرو اترو له لارې د شخړو د حل ملاتړ کوونکی ثابت شو.»
پاکستان دا اعلان وروسته له هغه وکړ چې د پاکستان د پوځ مشر، جنرال عاصم منیر د امریکا له ولسمشر ترمپ او همدا راز د سپینې ماڼۍ له لوړپوړو چارواکو سره بې ساری رسمي ملاقات درلود.
یاده دې وي، چې روان میلادي کال د اپرېل پر ۲۲ د هند تر واک لاندې کشمیر کې خونړی ترهګریز برید وشو، او وروسته بیا هند د مۍ پر ۷ هوايي پر پاکستان بریدونه وکړل، داسې بریدونه چې هند ورته ځوابي اقدامات ویلي ول.
د دواړو ګاوندیو هیوادونو ترمنځ د کړکېچ په پراخېدو د امریکا ولسمشر دونالد ټرمپ د مۍ پر ۱۰ اعلان وکړ چې دواړه هېوادونه دې اوربند ته غاړه کېږدي، او له دې لارې جګړه ختمه شوه. پاکستان مخکې هم د ټرمپ د منځګړیتوب هرکلی کړی و او وايي چې غواړي د کشمیر شخړې د حل له پاره هم ولسمشر ترمپ رول ولوبوي.