ولي په امريکا کي يوې الوتکي پر ښوونځيو تيل پاشلي؟
۱۳۹۸ دی ۲۵, چهارشنبه
د امریکا متحده ايالاتو د لاس انجلس ښار د اطفایې د معلوماتو پراساس يوې الوتکي چي له دغه ښار څخه د چين د شانگهای پر لور پرواز کړی وو، تر الوتني لږ وروسته يې په ماشين کي د تخنيکي عوارض له کبله تيل په هوا کي خوشي کړي دي.
دغه تيل بيا پر څو ښوونځو باندي راتوی سوی چي کوچنيان او لويان يې ټپيان کړي دي. د اطفايي د معلوماتو له مخي ددغه ميلیوني ښار یوازي د یوه ابتدايي مکتب د لوبو په میدان کي ۲۰ کوچنیان او ۱۱ لویان ټپيان سوي دي.
د راپورونو له مخي د دغو تيلو له کبله ټپیانو سوو کسانو ته تنفسي تکلیف او د پوست تخریش ورپيښ سوی دی. خو هیڅوک روغتون ته نه دي لیږل سوي.
ویل کیږي چي پر مجموعأ شپږو مکتبونو باندي تیل اورېدلي دي. اطفايې همدارنگه د پيښي سيمه ته له نژدې اوسیدونکو څخه غوښتي دي چي د کیروزینو د بوی په سبب دروازې او کړکۍ تړلي پریږدي.
دغه ځای چي تیل ورباندي پاشل سوي دي، تقریباً۲۰ کیلومتره د لاس انجلس د بين المللي میدان څخه لیری دی. د دلتا هوايي شرکت يوې بویینگ ۷۷۷ ډوله طیارې د شانگهای په موخه تر پرواز لږ وروسته په ماشین کي د عوارض له کبله باید بیرته گرزیدلې وای.
د دلتا هوايي شرکت په حواله د دې له پاره چي د الوتکي وزن کم سوی وای، تیل باید ورڅخه ایله سوي وای، تر څو تر کښینستو دمخه یې پر سم وخت وزن کم سوی وای.
د پلان مطابق تر چین پوري دغه پرواز ۱۴ ساعته دوام کاوه او د الوتکي ټانکۍ یې په اصطلاح تر څوکي پوري ډکي سوي وې. خو د دلتا شرکت په خبره تر هغه وروسته الوتکه ډاډه کښینستلې ده.