سترې محکمې د جنرال باجوه د دندې د غځیدو اعلان ځنډولی
۱۳۹۸ آذر ۵, سهشنبه
د پاکستان د پوځ د مشر جنرال قمر باجوه درې کلنه کاري دوره د نومبر میاشتې په ۲۹مه نېټه پای ته رسیده خو د پاکستان لومړي وزیر عمران خان، د نورو درو کلونو له پاره د هغه د دندې د غځولو اعلان کړې وو. د جنرال باجوه د کاري دورې د غځیدو منظوري د پاکستان ولسمشر عارف علوي د روان کال اګست میاشتې په ۱۹مه نېټه ورکړې وه. د هغه د دندې د غځولو علت په سیمه کې امنیتي اندیښنې په ګوته شوې وې.
د پاکستان د پوځ د مشر د کاري مودې د غځولو نیټه په محکمه کې چیلنج شوې وه. په دې تړاو سترې محکمې ته د ریاض حنیف په نوم یو کس عریضه وړاندې کړې وه.
کله چې د نومبر په ۲۶مه نېټه ریاض حنیف له محکمې څخه د خپلې عریضې د بیرته اخیستلو غوښتنه وکړه، نو محکمې وویل چې دوی خپله غواړي پر دې موضوع غور وکړي او بیلا بیلو کسانو ته یې په دې تړاو خبر ورکړ. د پاکستان د پوځ لوی درستیز جنرال قمر باجوه ته هم خبر ورکړل شوی چې په خپله یا د خپل مدافع وکیل په واسطه محکمې ته خپل دریځ وړاندې کړي.
د ریاض حنیف له لوري د خپلې عریضې د بیرته اخیستلو په هکله چې کوم سند چې محکمې ته وړاندې شوې وو، هغه په لاس لیکل شوی وو. د پاکستان قاضي القضات آصف کهوسه په دې هکله حیرانتیا وښوده. د استماعیه غونډې پر مهال عریضه کوونکی او د هغې مدافع وکیل هم په محکمه کې حاضر نه ول. د سترې محکمې قاضیانو وویل چې دغه عریضه د اوریدو وړ ده او د چهارشنبې په ورځ به په دې تړاو استماعیه غونډه ادامه ومومي.
قاضي القضات وویل چې د دستور له مخې له لومړي وزیر سره د پوځ د مشر د کاري دورې د غځولو صلاحیت نه شته او دا صلاحیت یوازې ولسمشر لري. قاضي القضات ټینګار وکړ چې د ولسمشر له خوا د منظورۍ وروسته، لومړي وزیر ولې دغه کاري موده وغځوله.
عابد حسين قريشي