د امريکا او اروپا ترمنځ ستره سوداګريزه هوکړه
۱۴۰۴ مرداد ۶, دوشنبه
امريکا متحده ايالات او اروپايي ټولنه د يکشنبې په ورځ (۲۰۲۵م کال د جولای ۲۷) يوې سوداګريزي هوکړي ته ورسېدل چي له مخي به يې د دواړو اړخونو ترمنځ پر توکو باندي ګمرکي تعرفي همداسي ۱۵ سلنه پاته سي. دغي هوکړي د اتلانتيک د دواړو غاړو ترمنځ د يوه ستر سوداګريز بحران مخه ونيوله.
د امريکا متحده ايالاتو ولسمشر دونالد ترمپ، د سکاټلينډ په ترنبري کي د اروپايي کمېسيون د مشري اورزولا فون درلاين سره تر ليدني وروسته امريکايي خبريالانو ته د دغي هوکړي خبر ورکړ او هغه يې د خپلي ولسمشرۍ دورې تر ټولو «ستر توافق» وباله.
اورزولا فون درلاين هم تائيد کړه چي توافق سوی دی او ويې ويل: «خبري اتري ستونزمني وې، خو بالاخره موږ بريالي سو».
د تړون له مخي اروپايي ټولني ژمنه کړې ده چي له متحده ايالاتو څخه به د ۷۵۰ ميلياردو ډالرو په ارزښت انرژي اخلي او دغه راز به د امريکا په اقتصاد او نظامي صنعت کي ۶۰۰ ميليارده ډالره پانګونه وکړي. د موټرو پر وارداتو به تعرفي همداسي ۱۵ سلنه وي چي دا د جرمني د موټرو صنعت اصلي غوښتنه ده. په هرحال، دارو درمل او د فولادو او آلمونيمو واردات په دې هوکړه کي شامل نه دي او تعرفي به يې په سلو کي ۵۰ سلنه وي.
د تعرفيي جګړې د پراخيدو ګواښ
دا تړون له هغه وروسته نهايي سو چي ترمپ، فون درلاين ته په ليک کي ګواښ کړی وو چي که د اګست مياشتي تر لومړۍ نېټې پوري کومه موافقه و نه سي نو پر ډېرو اروپايي وارداتو به ګمرکي تعرفي ۳۰ سلني ته لوړي کړي.
اروپايي ټولني هم په جواب کي د غچ اخيستي په توګه د ۹۳ ميلياردو ډالرو په ارزښت امريکايي توکو ليست چمتو کړ چي پکښې موټر، الوتکي او ويسکي شامل ول او ټاکل سوې وه چي د اګست مياشتي له ۷ نېټې څخه به عملي سي.