د افغانستان له پاره داروپايي ټولني دخاص استازي دماموریت پای
۱۴۰۴ فروردین ۲۵, دوشنبه
د افغانستان له پاره د اروپايي ټولنې ځانگړي استازي توماس نیکلسون د یکشنبې په ماښام د ایکس په شبکه کي د یوه پیغام په خپرولو سره اعلان کړی دی چي په افغانستان کي یې ماموریت د روان میلادي کال د مارچ مياشتي له لومړۍ نیټې څخه پای ته رسیدلی دی.
نوموړي ټینگارکړی دی چي د دغه ماموریت پای ته رسیدل، د افغانستان په اړه د اروپايي ټولنې په چلند کي د کوم بدلون نخښه نه ده.
د اروپايي ټولنې ځانگړي استازي توماس نیکلسون، د دغه پیغام په یوه برخه کي لیکلي دي: «اروپايي ټولنه همدارنگه په دغه هیواد کي خپل حضور ته ادامه ورکوي، د افغانستان خلکو ته خپلو ژمنو ته وفاداره ده او په عین حال کي د نوموړې ټولني د گټو او ارزښتنو ملاتړ کوي.»
هغه زیاته کړې ده چي دغه ټولنه به د اروپايي ټولني د شورا د جمع بندۍ له مخي له افغانستان او خپلو شریکانو سره تعامل وکړي.
په پام کي ده چي تر راتلونکي خبرتیا پوري به د افغانستان له پاره د اروپايي ټولني د ځانگړي استازې دندې د اروپايي ټولني د بهرنیو اقداماتو په سرویس کي د افغانستان او پاکستان د څانگې مشر درن دریا، ته وسپارل سي.
اروپايي ټولنه د افغانستان یوه له سترو تمویل کوونکو څخه شمیرل کیږي.
توماس نیکلسون، د ۲۰۲۱م کال د می مياشتي پر ۲۲مه د افغانستان په چارو کي د اروپايي ټولنې د ځانگړي استازي په توگه خپله دنده پیل کړه، خو یو څو میاشتي وروسته طالبان په دغه هیواد کي واک ته ورسیدل.
اړوند:اروپايي ټولنه له افغانستان سره شاوخوا ۲۰ میلیونه یورو مرسته کوي
د دغو کلونو په ترڅ کي، نوموړي له افغانستان سره په داسي شرایطو کي چي دغه هیواد په نړۍ کي له دوهم انساني بحران سره لاس او گریوان وو، د اروپايي ټولني د بشري مرستو د رسولو او همږغۍ مسئولیت پر غاړه درلود. هغه همدارنگه د نجونو د زده کړو په برخه کي له سیمه اسیزو نوښتونو ملاتړ کړی او له طالبانو سره یې د تعامل د برقراره کولو له پاره هلي ځلي کړي دي.