ایران: د دریو افغانانو په گډون ۷ کان کیندونکي مړه سوي دي
۱۴۰۴ فروردین ۱۹, سهشنبه
ایرنا دولتي خبري آژانس رپوټ ورکړی دی، چي د څلورو ایراني او دریو بهرني اتباعو په گډون اوو کسانو د گاز نیونې په پیښه کي خپل ژوند له لاسه ورکړی دی. ایران افغانانو ته بهرني اتباع وایي.
دغه پیښه د سمنان ولایت د دامغان د ډبرو سکرو په کان کي رامنځته سوې ده.
د نوموړي رپوټ په حواله، دغه کان کیندونکي د ابتدايي ارزونې له پاره کان ته ننوتلي وه چي په گاز نیونې اخته سول. په دغه پیښه کي یوه قراردادي له خپل وراره سره هم ژوند له لاسه ورکړی دی.
په دغه پیښه کي وژل سوي افغانان شاوخوا ۲۰ او ۲۵ کاله عمر درلود او جسدونه یې له کان څخه بهر راایستل سوي دي.
د سمنان ولایت د پراختیایي چارو د همږغۍ سرپرست مرستیال فرجالله ایلیات، ویلي دي: د مهماندویه د کلي د «جواهر زغال» کان څلور تونله لري، چي له نورو تونلونو څخه استخراج ترسره کیږي او دغه پیښه په داسي یوه تونل کي رامنځته سوه چي د یو څه وخت له پاره ورڅخه استفاده نه کیدله او معدني مواد ورڅخه نه استخراجیدل.
دغي پیښې چي د گاز نیونې له امله د نهو کارگرو د ژوند په بیه تمام سوه، په کانونو کي د خوندیتوب او څارنې اهمیت روښانه کړ.
نوموړې پیښه ښيي چي د دا ډول مرگونو پیښو د تکرار د مخنیوي له پاره باید کانونه په منظم ډول وڅارل او معاینه سي.