اسرائیل: د اوین پرزندان او سپاه پاسداران باندي هوايي برید
۱۴۰۴ تیر ۲, دوشنبه
د اسرائیل د دفاع وزیر اسرئیل کاتڅ، د ایکس په آنلایني سرویس کي لیکلي دي چی ددغه سیاسي زندان ترڅنگ، هوايي ځواکونو د دوشنبې په ورځ د ایران د سپاه پاسداران پیاوړی مرکز هم بمباري کړی دی.
د اسرائیل پوځ څرگنده کړه چی هغوی د سپاه پاسداران د قوماندې مرکز او د ایران نور پوځي امنیتي ځواکونه په نښه کړي دي. هغوی "د رژیم د ثبات ساتلو" مسؤلیت پرغاړه لري.
ایران د اوین پر زندان د برید خبره تائید کړې ده. د میسان د عدالت پر ویبپاڼه راغلي دي چي په دغه برید کي د دغي کامپلیکس ودانۍ ځیني برخې زیانمنې سوي دي. خو وضعیت "تر کنترول "لاندي دی.
اړوند:د امریکا تر برید وروسته ایران او اسرائیل پر یو بل حملې کړي
کاتڅ څرگنده کړه چي د اسرائیل هوايي ځواکونو "د تهران په زړه کې د رژیم پر اهدافو او سیمه ایزو ظالمانه تاسیساتو په بې ساري قوت سره برید کوي." ایراني رسنیو په تهران کې د بریښنا د رسولو پر سیستم باندې د اسرائیل د بریدونو رپوټ ورکړی دي، چې د بریښنا قطع کیدو سبب سوی دی.
د فردو پر اټومي تاسیساتو د اسرائیل برید
د ایران په سپاه پاسداران پوري تړلی د تسنیم خبري آژانس د رپوټ له مخې، اسرائیل همدارنگه د فردو پر اټومي تاسیساتو هم برید کړی دی. مخکي له دې د یکشنبې په شپه د امریکا پوځ په ویجاړوونکو بمونو سره د نورو ترڅنگ د فردو تاسیسات بمبارد کړل.
دغه تاسیسات په ځانگړي توگه د بریدونو په وړاندي ډاډمن گڼل کیږي، ځکه چي د یورانیمو د غني کولو سانتریفیوژونه د مځکې په ژوره کي پټ سوي دي.
اسرائیل د جون د میاشتي پر ۱۳ مه پر ایران باندي پراخ برید وکړ او له هغه راهیسي یې ددغه هیواد اټومي او نظامي تاسیسات په نښه کړي دي. ایران پس له هغه د غچ اخیستنې په توگه په توغندیو او بې پیلوټه الوتکو سره پر اسرائیل بریدونه کړي دي.
لویدیځ هیوادونه پر ایران تورلگوي چې د اټومي وسلو د ترلاسه کولو هڅه کوي، خو ایران دغه خبره ردوي.