Седум „еврозаповеди“ за Црна Гора
14 ноември 2010
Властите во Црна Гора се надеваат дека нивната земја наредната година ќе добие датум за почеток на преговорите за пристапување со Европската унија. За таа цел владата во Подгорица одлучи да донесе план за спроведување на седумте тешки „домашни задачи“, кои Црна Гора ги доби од Европската комисија во вторникот. Сите задачи се политичко-правни, т.е. се однесуваат на воспоставување на правото во државата.
Се‘ зависи од нас
Црногорската министерка за евроинтеграција Гордана Ѓуровиќ изјави дека на властите во Подгорица им претстојат многу задачи, и се надева дека кон почетокот на есента во 2011 година Црна Гора би требало да биде подготвена за евалуација:
„Сметам дека самите ги поставуваме роковите, и во најголем дел работите зависат од нас.“
Сега е на потег црногорската власт, за која ЕК наведува дека во изминатиот период не покажувала доволно политичка волја за решавање на отворените прашања, пред се‘ за одлучна борба против корупцијата и организираниот криминал. Лидерот на најголемата опозициска Социјалистичка народна партија Срѓан Милиќ вели дека „еврозаповедите“ се однесуваат на целото црногорско општество:
„Власта сега точно знае што мора да направи. Ако само власта добила задачи од Европската комисија, тогаш нема да успееме. Тоа беше сумирање и истакнување на проблемите во општеството, кои власта досега не ги решила. Тоа е задачата за Црна Гора.“
Потребни се сеопфатни промени
Аналитичарите во Подгорица проценуваат дека со поставените политички барања, Брисел сака да се промени досегашниот систем на авторитарно владеење во Црна Гора, кое го персонифицира шесткратниот премиер Мило Ѓукановиќ. Во секој случај, наредните 12 месеци ќе бидат стресен период за запуштеното црногорско општество и слабата државна администрација.
Исто така и творецот на црногорските економски реформи, професорот Веселин Вукотиќ е уверен дека од оваа недела во Црна Гора веќе ништо нема да биде исто:
„Треба да се променат многу работи во секоја компанија, кај секој поединец, како и во нашиот начин на размислување. Сите треба да гледаат на сето тоа во контекст на Европската унија. Сега се наоѓаме во една сосема поинаква ситуација.“
Автор: Мустафа Цанка / Јасна Мушиќ Јанчулева
Редактор: Симе Недевски