Милинкиевич во Берлин

Грмотевица од блицеви пред бирото на германската канцеларка, Ангела Меркел. Таа тивко, на руски разговара со својот гостин од Белорусија, Александар Милинкиевич. Дури и ако нема изјави за печатот, туку само термин за сликање, тоа е силен сигнал – германската влада и натаму стои на страна на белоруската опозиција, останува на своите критики на манипулациите што Лукашенко ги направи на изборите во таа земја и на критиките за начинот на кој што диктаторскиот режим потоа се однесуваше кон демонстрантите.

Генералниот секретар на ЦДУ, Роланд Пофала, кој и самиот неодмана беше во Белорусија, по разговорите што ги водеше со Милинкиевич изјави:

“...ние стоиме зад демократските сили и се залагаме за човековите права во Белорусија.“

Гостинот од Минск ги поздрави плановите на ЕУ за воведување забрана за патување за Лукашенко и 30 негови соработници. Меѓутоа, Милинкиевич е против други санкции:

“Многу сме воздржани што се однесува до економски санкции. Искуството покажува дека тие главно ги погаѓаат најсиромашните во општеството, а властодршците се многу помалку погодени. “

Милинкиевич пред новинарите во Берлин изјави дека и опозицијата во Белорусија е за добри односи со Русија:

“Стратегија на опозицијата во која Русија би била исклучена, нема да функционира. Мора да е јасно дека сегашниот режим без руска поддршка би издржал најмногу неколку месеци. И, да кажам јасно – нашата коалиција на опозициони сили воопшто не е анти-руска. Ние сме за добри односи со нашиот голем сосед, како политички, така и економски и тука не сакаме ништо да менуваме.“