Договорено намалување на даноците во Германија
7 ноември 2011
Германската канцеларка Ангела Меркел соопшти дека владата ќе воведе даночни олеснувања за Германците во следните две години во вредност од шест милијарди евра, како награда за бремето што го преземаат во европската должничка криза.
Спогодбата за даночни олеснувања е постигната доцна синоќа меѓу Христијанско-демократската унија и коалициските партнери.
Меркел: Владата се чувствува должна кон граѓаните
Даночните олеснувања ќе бидат воведени во две етапи. Првата, во јануари 2013 година, ќе биде во вредност од две милијарди евра и ќе го олесни даночниот товар на Германците со ниски и средни примања, а втората, во јануари 2014 година, ќе биде во вредност од четири милијарди евра.
Канцеларката изјави дека владата ќе ги продолжи напорите за намалување на дефицитот, но паралелно со тоа се чувствува должна да направи нешто и за граѓаните.
Во договореното намалување на даноците спаѓа и постепено укинување во 2013 и 2014 година на т. н. „„ладна прогресија“. Поимот го означува автоматското преместување во повисока даночна група на вработениот кога тој ќе добие зголемување на платата. И кога тарифното зголемување на примањата во проценти е израмнување со инфлацијата, вработените поради овој прогресивен ефект треба да плаќаат повеќе даноци.
Опозицијата е против
За намалувањето на даноците треба да се изјасни Бундесратот, Претставничкиот дом на покраините, каде црно-жолтата коалиција нема мнозинство. Опозиционата Социјалдемократска партија на Германија најави тужба пред суд поради најновата одлука на владејачките партии, зашто е против намалување на даноците. Вишоците од даноците треба да служат за разградување на државниот дефицит, инсистира СПД.
Даночните олеснувања беа едно од предизборните ветувања на владата на Ангела Меркел. Германија очекува годинава да собере 16 милијарди евра повеќе од даноци во споредба со предвиденото, соопшти Министерството за финансии. Вкупните приходи од даноци за 2011 година ќе изнесуваат 571 милијарди евра.
Автор: Жана Ацеска/ СН/дв/миа
Редактор: Елизабета Милошевска Фиданоска