Лето, сонце, конфликти: летни распусти во Германија

Околу 11,4 милиони деца и млади луѓе посетуваат училишта во Германија. Доколку тие и нивните семејства одат на одмор во исто време, последицата би била уште поголем сообраќаен метеж на автопатите, преполни возови и хотели.

Затоа секоја од 16-те сојузни покраини на  Германија  ги започнува своите летни училишни одмори во различно време. Така, на пример, во Саксонија, шестнеделните летни одмори во 2025 година започнаа на крајот на јуни, додека во Баварија ќе започнат дури на почетокот на август.

Овој развлечен период на летни одмори е во интерес и на туристичкиот сектор. Хотелите, плажите и забавните паркови остануваат рамномерно посетени во текот на неколку месеци.

Кој одлучува кога која сојузна покраина има училишен одмор?

Образованието во Германија е одговорност на сојузните покраини, а не на сојузната влада во Берлин. Затоа, покраините самостојно одлучуваат за училишните распусти.

Сепак, министрите за образование на сите 16 сојузни покраини се координираат едни со други на таканаречената Конференција на министри за образование (Kultusministerkonferenz). Таму, тие заеднички ги планираат датумите на распустите неколку години однапред. Повеќе од 50 години, тие се обидуваат да ги усогласат сите интереси на овој начин.

Бидејќи училишните полугодија треба да бидат приближно исто долги во сите покраини. На училиштата им е потребно и доволно време за испити пред големите  одмори - како и за патувања, спортски денови или проектни недели.

Зошто има кавги секоја година?

Затоа што секоја сојузна покраина би сакала да има најдобри термини. Значи, не само доволно време за испити, туку и што е можно повеќе сонце, евтини летови и хотели. Сето ова е потешко да се добие во средината на јули отколку на крајот на август.

Подоцнежните термини се особено барани. Тие ветуваат пријатно време и, поради почетокот на постсезоната, подобри понуди за патувања.

Спорот, меѓутоа, главно се должи на две сојузни покраини: Баварија и Баден-Виртемберг. Тие не учествуваат во ротацијата на термините и инсистираат секогаш да се последни со започнување на летните распусти.

Порано, тие го оправдуваа ова со фактот дека децата во училиштата во земјоделските региони мора да помогнат со жетвата. Денес тие се повикуваат на нивниот доцен верски празник Духовден.

Дали има решение на повидок?

Сè уште не. Со години, претставници на други покраини ги повикуваат Баварија и Баден-Виртемберг на соработка. На пример, министерката за образование на Северна Рајна-Вестфалија Дороти Фелер во интервју за „Вестдојче алгемајне цајтунг“ изјави: „Северна Рајна Весфалија исто така би сакала да има подоцнежен почеток на распустот".

Сепак, година по година, овие две јужни покраини ги отфрлаат таквите предлози. Како што сега прави баварскиот премиер Маркус Зедер од конзервативната  ЦСУ.  Тој во тековната дискусија изјави: „Ние имаме свој ритам на празниците, кој е, така да се каже, врежан во ДНК-та на Баварците“.

Но, дури и ако Баварија и Баден-Виртемберг попуштат, промената би била можна само дури по пет години - бидејќи сите термини се веќе договорени дотогаш.

Дали овој проблем постои и во други земји?

Германија не е единствената земја каде што летните распусти почнуваат и завршуваат различно по региони. На пример, во Холандија постојат три регионални зони со различни почетоци на летните распусти. Сепак, тие се разликуваат за максимум две недели - а датумите ги одредува централното Министерство за образование.

Во некои други земји, како што е Велика Британија, ротирачкиот систем се дискутира долго време. А некои земји, како Франција, признаваат дека имаат поделен почеток на распустите - но не и за особено долгите летни распусти.

Годишната дебата за почетокот на распустите помеѓу југот на Германија и остатокот од земјата останува исклучиво германски летен ритуал.