Војска во Лос Анџелес: Која е целта на Трамп?

Тоа е конфликт на повеќе нивоа и се чини дека се интензивира сè повеќе. Одамна е повеќе од само протест против депортацијата на мигранти. Станува збор за личен конфликт меѓу Доналд Трамп  и гувернерот на Калифорнија, демократот Гевин Њусом. И пред сè, станува збор за прашањето дали американскиот претседател има право да користи  воена сила против цивили. И што има намера да постигне со тоа. 

Трамп ги нарече  демонстрантите во Лос Анџелес  „професионални агитатори и бунтовници“. Малку подоцна, претседателот додаде: „Фала му на Бога што таму испративме некои прекрасни припадници на Националната гарда".

Војниците не се обучени за дејствување против цивили

Трамп го направи тоа спротивно на желбите на гувернерот на Калифорнија, Њусом. Републиканскиот сенатор Том Котон од Арканзас го брани претседателот: „Законот е апсолутно јасен“, изјави Котон за Фокс њуз.  Националната гарда,  вели тој, традиционално е под команда на гувернерот на секоја федерална држава, но може да се стави и под команда на претседателот за воспоставување ред и спроведување на федералниот закон.

Демократскиот конгресмен Сет Молтон од Масачусетс не се согласува: „Во Америка, таа се користи само во најекстремни и исклучителни околности - затоа што сме демократија. И не ја политизирате војската со тоа што ќе барате од неа да преземе акции против американските граѓани“, изјави Молтон за Си-Ен-Ен.

Војниците не се обучени да дејствуваат против цивилни демонстранти, нагласува Хамин Шамси, експертка за безбедност во организацијата за граѓански права Американска унија за граѓански слободи. Таа се плаши дека претседателот всушност сака да си даде бланко чек, за подоцна да може да ја испрати војската не само во Лос Анџелес, туку насекаде во земјата каде што луѓето сакаат да демонстрираат против имиграциските рации.

Одвлекување на вниманието од неуспехот?

Обвинувањата на критичарите на Трамп одат уште подалеку. „Сето ова служи за одвлекување на вниманието од неуспесите на администрацијата на Трамп во други области“, изјави за Си-Ен-Ен демократот Алекс Падиља, кој ја претставува Калифорнија во американскиот Сенат. „Царините се голем неуспех, нема мир меѓу Русија и Украина, а 'големиот и прекрасен' закон за даноци и буџет на Трамп виси во воздух. Кризата што ја создаде во Лос Анџелес сега го одвлекува вниманието од сето тоа.“

Гувернерот на Калифорнија, Гевин Њусом, поднесе  тужба против распоредувањето на Националната гарда,  а комесарот за гранична патрола на Трамп, Том Хоман, се закани дека ќе го уапси Њусом. Доколку американските маринци на кои сега им е наредено да бидат распоредени во Лос Анџелес навистина бидат распоредени, тоа би значело понатамошна ескалација на ситуацијата.

„Никогаш порано не сме виделе нешто вакво“

Кен Кучинели, заменик-министер за внатрешна безбедност во првиот мандат на Трамп, за Си-Ен-Ен изјави: „Преземањето на тој следен чекор дополнително би ја зголемило сериозноста на ситуацијата. Но, претседателот Трамп ќе го стори она што смета дека е исправно за да донесе мир на улиците на Лос Анџелес“.

Според Џулиет Кајем од Универзитетот Харвард, претседателот на крајот би ги пречекорил своите уставни овластувања со распоредување на маринците. „Таму на улиците, таквото распоредување не е неопходно. Протестите очигледно не се од тој обем. Ние не сме во вид на вонредна состојба или криза каква што ја прикажуваат претседателот и неговите министри“, рече Кајем. И заклучува: „Никогаш порано не сме виделе нешто вакво“.

Автор: Ралф Борхарт, АРД