Украина: Многу жртви во рускиот напад врз Кривиј Рих
5 април 2025
По рускиот ракетен напад врз родниот град на претседателот Володимир Зеленски, украинските власти известуваат за бројни загинати и повредени. Според тие информации, најмалку 18 лица загинале во нападот на станбена населба во Кривиј Рих. Меѓу жртвите има и девет деца, напиша регионалниот гувернер Серхиј Лисак на Телеграм. Според него, повредени се повеќе од 60 лица.
Смртоносниот напад е уште еден доказ дека Русија „не сака прекин на огнот“, напиша Зеленски на онлајн сервисот Телеграм. Само меѓународниот притисок врз Русија и максималните напори за зајакнување на Украина и нејзината воздушна одбрана и вооружените сили може да придонесат за „одлуката кога војната ќе заврши“.
Русија зборува за напад врз војници
Руското Министерство за одбрана, пак, соопшти дека ракета погодила група украински војници со странски инструктори во Кривиј Рих. Во нападот се убиени до 85 војници и офицери од странство, а уништени се до 20 возила“, соопшти Министерството на Телеграм.
Градот Кривиј Рих во централна Украина е редовно гранатиран од страна на руската војска од почетокот на руската агресорска војна во Украина. Во последниот ракетен напад врз градот во средата загинаа четири лица. Кривиј Рих се наоѓа на околу 60 километри северозападно од линијата на фронтот и пред војната имал повеќе од 600.000 жители.
САД против „бесконечни преговори“
Во меѓувреме, САД стануваат нетрпеливи во своите напори за прекин на огнот во Украина, јавуваат новинските агенции, повикувајќи се на извори од НАТО. Затоа, министерот за надворешни работи Марко Рубио на состанокот на Алијансата во Брисел јасно стави до знаење дека претседателот Доналд Трамп веројатно нема уште долго да ја толерира сегашната тактика на одолговлекување на рускиот претседател Владимир Путин.
Рубио, наводно, рекол дека се работи повеќе за „недели отколку за месеци“. Тој нагласи дека Трамп нема да падне во замката на „бескрајни преговори за преговорите“. Ако Москва сака мир, тоа е одлично. Ако не, САД мора повторно да проценат „каде сме и како да постапиме“. Сепак, остана нејасно како ќе реагираат САД доколку Путин не го промени курсот.