Вадефул пристигна во прва посета на Украина

Германскиот министер за надворешни работи Јохан Вадефул ја прогласи поддршката за Украина за најважна надворешнополитичка цел на владата во Берлин. „Слободата и иднината на Украина се најважната задача на нашата надворешна и безбедносна политика“, изјави тој денеска (30.06) за време на посетата на Киев. „Затоа, ние ќе продолжиме целосно да се фокусираме на поддршката на Украина“, рече Вадефул.

Според него, во Украина се одлучува дали границите во Европа можат да се поместат со сила. „Украинците ја бранат не само слободата и суверенитетот на својата земја, туку и безбедноста и слободата на Европа од агресијата на Путин“, изјави Вадефул. Путин, додаде тој, сака да ја покори Украина и дури користи брутално бомбардирање за да го постигне тоа. „Но, ние ќе продолжиме цврсто да стоиме на страната на Украина“, вети германскиот министер за надворешни работи.

Вадефул најави натамошни санкции против Русија. „Во ЕУ и со нашите партнери од Г7 продолжуваме да работиме на ова со најголем притисок“, рече тој. Сепак, пред речиси две недели, на состанокот на Г7 во Кананаскис, Канада, не беше договорена заедничка изјава за Украина. Пред сѐ американскиот претседател Доналд Трамп е оној кој се двоуми да заземе построг став против рускиот претседател Владимир Путин.