Корупција: Уапсен претседателот на украинскиот Врховен суд

Антикорупционерите во Украина открија корупциски скандал во Врховниот суд. Претседателот на судот Всеволод Књазјев е уапсен додека примал мито во висина од три милиони американски долари (2,76 милиони евра), објави интернет весникот „Украјинска правда“. Украинското Национално биро за борба против корупцијата (НАБУ) објави фотографија од снопови банкноти ставени на кауч. Повеќе детали се најавуваат за прес-конференцијата која треба да се одржи денеска (16.05).

Претреси и кај други судии

Медиумите во Киев објавија дека имало рации и кај други судии од Врховниот суд. Според НАБУ и Специјалното обвинителство (СО), тие откриле „корупција од големи размери во Врховниот суд, особено план за добивање неоправдани предности од раководството и судиите на Врховниот суд“, се вели во соопштението на НАБУ и СО.

Соопштението не открива кој кого требало да поткупи и зошто. Књазјев, кој сега има 43 години, беше назначен за претседател на Врховниот суд во октомври 2021 година.

Украинскиот претседател Володимир Зеленски постојано ветуваше порешителна борба против културата на поткупување во земјата. Зеленски сака пред сѐ да покаже дека Украина, како кандидат за пристап во ЕУ,е подготвена да преговара за членство во Европската унија.