Украина и САД потпишаа меморандум за договорот за суровини

По долги натегања, Украина и САД потпишаа меморандум за разбирање пред склучување договор за суровини. Ова го објави украинската министерка за економија и вицепремиер Јулија Свириденко на Фејсбук.

„Денеска беше направен  чекор кон договор за заедничко економско партнерство со САД“,  напиша таа. Текстот на самиот договор, со кој  САД би  добиле пристап до ретките минерали и суровини и други вредни ресурси во Украина, допрва треба да биде финализиран.

Американскиот претседател  Доналд Трамп  претходно најави потпишување на договорот за следната недела. Тој на новинарите во Белата куќа им изјави дека тоа може да се случи веќе следниот четврток.

Според Свириденко, документот мора да биде ратификуван и од парламентите откако ќе биде потпишан. „Се подготвуваме да формираме  фонд за инвестиции во обновата на Украина“,  соопшти таа. Договорот ќе овозможи значителни инвестиции, модернизација на инфраструктурата и заемно корисно партнерство. Тоа е инвестиција во иднината за слободна, суверена и безбедна Украина. Но, има „уште многу да се направи“, додаде таа. Сепак, сегашното темпо и „значителниот напредок“ сугерираат дека „документот ќе биде многу корисен за двете земји“.

Претходно, украинскиот претседател  Володимир Зеленски  го најави меморандумот како меѓучекор кон договорот за суровини. Тој објасни дека правниците продолжуваат да работат на обврзувачки договор за суровини.

На крајот на февруари, потпишувањето на нејасен рамковен договор пропадна по јавниот скандал за време на посетата на Зеленски на Вашингтон. Трамп и неговиот потпретседател Џеј Ди Венс го обвинија шефот на украинската држава во Овалната соба пред камери во живо за непочитување и недостиг на благодарност за американската воена помош.

Разговорите за договор неодамна продолжија. Меѓутоа,  деталите за преговорите  што протекоа оставија мал оптимизам кај набљудувачите. Пред сè, барањата на американската администрација, колку што станаа познати, предизвикаа вистински бес во Украина. Затоа што новите барања очигледно не се однесуваат само на рамковен договор, како оној што требаше да биде потпишан во Вашингтон на крајот на февруари, туку наводно веќе предвидуваат како американските компании ќе ги искористуваат украинските природни ресурси и кои делови од украинската економија треба да бидат под контрола на САД.

Трамп веќе извесно време го притиска Киев да склучи договор за суровини. Зеленски го критикуваше фактот дека договорот не содржи никакви експлицитни гаранции од САД во однос на безбедноста на Украина. Трамп го гледа договорот првенствено како  парична отплата за воената помош што веќе ѝ е доделена на земјата   нападната од Русија.