Трамп: Царини за Бразил поради судењето на Болсонаро

Тонот станува поостар, притисокот се зголемува. Соединетите Американски Држави и Бразил се наоѓаат веројатно во најтешката криза со надворешната политика во последните децении. А, крајот не е на повидок.

„Ниеден гринго нема да командува со овој претседател“, рече бразилскиот претседател Луиз Инасио Лула да Силва кон средината на јули. Тој го употреби терминот „гринго“, кој во латиноамериканските земји често се користи навредливо за Американците, откако американскиот претседател Доналд Трамп му се закани на Бразил со царини од 50 проценти. Да Силва потоа додаде за Њујорк тајмс во средата дека „не се плаши“ од царините на Вашингтон.

„Тој е добар човек, а сакаат да го стават во затвор“

Сега Трамп ги исполни своите закани: царина од педесет проценти за речиси сè, освен за сок од портокал, дрво и делови за авиони. Но, ова е многу повеќе од трговски конфликт. Сепак, Бразил увезува повеќе стоки од САД отколку што извезува таму.

Американскиот претседател бара од Бразил да го запре наводното „политички мотивирано“ кривично гонење на поранешниот претседател Жаир Болсонаро. „Претседателот Болсонаро е добар човек, а тие сакаат да го стават во затвор. Го сметам тоа за лов на вештерки и тоа е многу тажно. Никој не е среќен од она што го прави Бразил, бидејќи Болсонаро беше почитуван претседател, многу почитуван“, рече Трамп.

Со пучот се обиде да остане на власт

Десничарскиот поранешен шеф на државата и сојузник на Трамп, Болсонаро, слично како Трамп малку порано, во 2022 година не го призна изборниот пораз. Неговите поддржувачи потоа упаднаа и го демолираа административниот округ Бразилија, главниот град на Бразил. Тие сцени потсетија на нападот врз американскиот Конгрес во Вашингтон.

Сега Болсонаро мора да излезе на суд за наводниот обид за државен удар. Тој се соочува со затворска казна до 40 години.

Непосредно пред администрацијата на Трамп да објави воведување царини за Бразил во средата, таа објави и санкции против бразилскиот судија на Врховниот суд Александар де Мораес, кој стана еден вид симбол на судскиот процес против Болсонаро.

Одмазда и против бразилскиот судија

Бразилските медиуми ја цитираа објавата на американскиот министер за финансии Скот Бесант на социјалните медиуми. Мораес, според него, наводно е одговорен за „репресивна кампања на цензура, произволни апсења, кршење на човековите права и политички мотивирано кривично гонење“ - вклучително и против поранешниот претседател Болсонаро. Така се образложени американските таканаречени Магницки санкции, кои се применуваат од 2017 година против лица обвинети за најсериозни кршења на човековите права.

Тие санкции подразбираат сериозни ограничувања - тие се огромни и сеопфатни, објаснува Хозе Аугусто Фонтура, професор по меѓународно право на Универзитетот во Сао Паоло. На Мораес му е забрането да патува во САД и да поседува имот таму. „Тој не може да користи кредитни картички како Виза или Мастеркард, не може да купи книга на Амазон, а можно е и бразилските финансиски институции да бидат под притисок.“

Членовите на владата на сегашниот претседател Да Силва ја обвинија администрацијата на Трамп за тежок напад врз бразилската демократија. Од друга страна, поддржувачите на Болсонаро ги славеа санкциите. „Нема да го заборавиме тоа на владата на Трамп“, напиша еден од синовите на Болсонаро, Едуардо, на социјалните мрежи. Тој веќе со месеци лобира за својот татко во САД.

Зошто Пекинг може да биде задоволен?

Бразилскиот претседател, во меѓувреме, покажа решителност и борбен дух. „Можеби Трамп не знае дека судството во Бразил е независно“, рече тој во интервјуто за Њујорк тајмс објавено во средата. Благодарение на нападот на Трамп и неговата сопствена одбрана на суверенитетот на Бразил, Лула да Силва доживеа неочекуван пораст на популарноста, според истражувањето на агенцијата Атлас Интел.

И иако царините тешко дека ќе го погодат Бразил, земјата е економски помалку зависна од извозот во САД отколку другите земји во регионот. Најголема корист ќе има земјата со која Трамп најмногу се бори - Кина. Народна Република Кина е веќе најважниот трговски партнер на Бразил.

Авторка на текстот:  Ане Херберг, АРД, Рио де Женеиро