Трамп навестува договор за царини со ЕУ – под свои услови

Американскиот претседател  Доналд Трамп најави дека ќе ги намали заканувачките царини за увоз на европски производи - ако Европската Унија повеќе го отвори својот пазар за САД.

На манифестација посветена на вештачката интелигенција, Трамп за тековните преговори изјави: „Ако се согласат да ја отворат Унијата за американски компании, тогаш ќе воведеме пониска царина“. Тој додаде дека се во тек сериозни преговори.

Американскиот претседател Трамп тукушто  постигна согласност со Јапонија за царини од 15 проценти  - значително помалку од првично планираното. САД, исто така, преговараат за трговски договор со ЕУ со недели, кој има за цел да спречи царините од 30 проценти што веќе ги објави Трамп да бидат воведени на 1 август.

Во меѓувреме, Белата куќа ги намали надежите дека  Европската Унија  се движи кон трговски договор со Вашингтон што би резултирал со општа царина од 15 проценти за стоките од ЕУ увезени во  Соединетите Американски Држави.

Дискусиите за можни трговски договори со САД треба да се сметаат за шпекулации, освен ако претседателот Доналд Трамп не ги објави, изјави портпаролот на Белата куќа, Куш Десаи.

Трамп, во меѓувреме, го пофали неодамнешниот договор меѓу САД и НАТО според кој европските сојузници ќе купуваат и снабдуваат оружје за Украина во нејзината борба против Русија. „Тие ќе преземат 100 проценти од трошоците за целата воена опрема за САД, а голем дел од тоа ќе оди во Украина.“Претходно, германскиот канцелар  Фридрих Мерц  навести дека наскоро е можен договор во трговскиот спор меѓу ЕУ и САД. Сепак, по средбата со францускиот претседател Емануел Макрон, двајцата ја изразија својата  решеност да одговорат на можните американски царини  за стоките од ЕУ со  контрамерки доколку не се најде решение во тековните преговори.