Трамп ја намали царината за Македонија од 33 на 15 проценти

САД ја намалија царината за увоз на македонски производи од 33 на 15 проценти. Станува збор за извршна наредба што во четвртокот (31.07) ја потпиша американскиот претседател Доналд Трамп за воведување царини за речиси сите земји кои досега немаат трговски договор со САД. 

Царина од 15 отсто САД ќе имаат и со Европската унија, со која склучија трговски договор на 27 јули. Од земјите во регионот, со царинска стапка од 15 проценти ќе бидат и Хрватска и Словенија, производите од Србија ќе се царинат со 35, од Босна и Херцеговина со 30, а најниска царина ќе има Црна Гора 10 отсто. Царинската стапка од 10 отсто ќе има и Албанија.

Нова наредба

Трамп во април годинава, првично објави царинска стапка за македонските производи од 33 отсто. Со новата извршна наредба на американскиот претседаел, се воведуваат нови царини помеѓу 10 и 50 проценти за речиси сите трговски партнери на САД. Новите американски царини, ќе стапат во сила на 7 август, а не на 1 август, со цел да се обезбеди повеќе време за нивно спроведување спроведување на новите царини.

Се преговара за пониски царини

Премиерот Христијан Мицкоски најавува дека се преговара за уште пониски царини. „Преговорите продолжуваат. Во моментот се наоѓаме на една условно кажано пауза. Веднаш по годишните одмори коишто ќе ги користи и администрацијата и од Кабинетот на претседателот Трамп и канцеларијата на трговскиот претставник на САД, но и нашите луѓе во министерството и институциите, очекуваме во втората половина на август да продолжиме со преговорите“, рече Мицкоски.

Статистичките податоци покажуваат дека во периодот од 2015 до 2024 година, извозот од Македонија во САД е речиси тројно зголемен. Според податоците од Државниот завод за статистика, извозот во САД во 2015 година изнесувал 36,5 милиони евра, додека во 2024 година достигнал 110 милиони евра. Најзначаен двигател на извозот е секторот на електрични машини и опрема, кој во 2024 година сочинува приближно 35–40% од вкупниот извоз во САД. Следни по важност се секторите текстил и облека и металната индустрија.