Трамп: Израел се согласи на договор за Газа, се чека Хамас

Израел, според наводи на американскиот претседател Доналд Трамп, се согласил со актуелизиран предлог за 60-дневен прекин на огнот во војната во Газа. Во овој период, САД ќе соработуваат со сите страни за да се стави крај на војната, напиша Трамп на својата платформа Truth Social. Тој го повика и исламистичкиот Хамас да го прифати предлогот. „Се надевам дека за доброто на Блискиот Исток, Хамас ќе го прифати овој договор, бидејќи нема да биде подобро - само ќе се влошува“, напиша тој.

Откако неодамна беше постигнат договор за прекин на огнот меѓу Израел и Иран по 12 дена војна, Трамп сега се залага за пробив во Појасот Газа, каде што војната меѓу Израел и Хамас трае речиси 21 месеци. 60-дневен прекин на огнот, за кој се преговараше со месеци, би бил важен чекор во таа насока. Претставници од Катар и Египет, кои беа силно посветени на мирот, сега ќе му го достават овој „конечен предлог“ на Хамас, напиша Трамп.

Ќе се согласи ли Хамас?

Засега нема индикации дека терористичката организација е подготвена да ги прифати условите на договорот. Не е јасно дали најновиот предлог ја има предвид централната точка на несогласување од претходните рунди преговори: барањето на Хамас за цврста обврска дека прекинот на огнот ќе доведе до траен крај на војната. Беа изнесени идеи со цел „да се натераат Израелците да се согласат. И тие се согласија“, изјави американски функционер за американскиот новински сајт „Аксиос“.

Израел се согласи на „неопходните услови“ за склучување на 60-дневниот прекин на огнот, напиша Трамп. Следната недела тој ќе го прими израелскиот премиер Бенјамин Нетанјаху во Вашингтон. На прашањето колку решително ќе му пристапи на Нетанјаху во врска со прекинот на војната во Газа, Трамп претходно рече „многу решително“. Нетанјаху, според него, исто така сака да се стави крај на војната. Тој очекува договор да се постигне следната недела, рече Трамп, откако пред неколку дена веќе најави евентуално прекин на огнот во Газа.