Трамп гo тужи Волстрит џурнал поради извештајот за Епстин

Американскиот претседател Доналд Трамп го тужи Волстрит џурнал (ВСЈ) и неговиот сопственик Руперт Мардок поради известување поврзано со врската на Трамп со озлогласениот финансиер од Њујорк, Џефри Епстин.

Тужбата доаѓа откако ВСЈ објави извештај во кој детално е опишано сексуално сугестивниото писмо за роденден што Трамп му го испратил на Епстин во 2003 година.

Тужбата, поднесена во федералниот суд во Мајами, Јужниот округ на Флорида, во петокот ги таргетира и новинарите кои работеле на приказната за Трамп и Епстин, како и компаниите на Мердок,  Дау Џонс  и Њуз Корп. Во тужбата за клевета Трамп бара најмалку 10 милијарди долари отштета.

Во статијата се наведува дека писмото потпишано од Трамп било вклучено во книгата за финансиерот по повод 50-тиот роденден на Епстин. Писмото од Трамп наводно содржи скица од гола жена и пораката: „Пријателот е прекрасно нешто. Среќен роденден - и нека секој ден биде уште една прекрасна тајна“.

Волстрит џурнал стои зад напишаното

Како одговор на тужбата на Трамп, издавачот на ВСЈ, Дау Џонс, застана зад извештајот за писмото на Трамп до Епстин.

„Имаме целосна доверба во строгоста и точноста на нашето известување и енергично ќе се браниме од каква било тужба“, изјави портпаролот на Дау Џонс. 

Трамп енергично негираше дека му го напишал писмото на Епсти, кој почина во затворска ќелија во 2019 година на 66-годишна возраст додека чекаше судење по обвинение за трговија со луѓе за сексуална експлоатација. Соработничката на Епстин, Гилејн Максвел, моментално е во затвор по федералните обвиненија за регрутирање девојки кои ги злоупотребувал Епстин. Врската на Трамп со Епстин е под лупа во последните недели дури и од неговите сопствени поддржувачи.

Контроверзниот „список на клиенти“ на Епстин

Порано месецов, Министерството за правда на САД и Федералното биро за истраги (ФБИ) утврдија дека Епстин немал „список на клиенти“ кој се користел за уценување на моќни личности. ДОЈ и ФБИ, исто така, повторија дека Епстин се самоубил и не е убиен.

Идејата за списокот на клиенти на Епстин, заедно со верувањето дека финансиерот бил убиен, е вообичаена меѓу поддржувачите на Трамп. Пред претседателските избори во 2024 година, функционерите сојузници на Трамп, како што е сегашниот директор на ФБИ, Кеш Пател, повикаа на јавно објавување на документи поврзани со Епстин.

Бидејќи администрацијата на Трамп се соочува со притисок да биде потранспарентна во случајот Епстин, Министерството за правда во петокот поднесе барање до федералниот суд во Менхетен за објавување на транскриптите од големата порота поврзани со Епстин. Тоа се случи откако Трамп ѝ наложи на државната обвинителка Пам Бонди да побара од судот да ги објави тие транскрипти еден ден претходно.