Судија ги запира масовните откази во американските агенции

Американски федерален судија, според медиумски извештаи, привремено го суспендирал масовното отпуштање на државни службеници иницирано од американскиот претседател Доналд Трамп. Како што објави „Вашингтон пост“, калифорнискиот федерален судија Вилијам Алсап наредил Службата за човечки ресурси да ги повлече упатствата испратени до неколку федерални агенции во САД кои доведоа до отпуштање на илјадници вработени. Службата нема „според никаков закон во историјата на универзумот овластување да вработува и отпушта вработени во друга агенција“, оценува Алсап во пресудата цитирана од „Вашингтон пост“.

Спор околу овластувањата

„Конгресот го делегираше овластувањето да вработува и отпушта вработени на самите агенции“, ја објасни судијата својата наредба пред федералниот суд во Сан Франциско. Тој, притоа, се осврнува и на Пентагон. „Министерството за одбрана, на пример, има законско овластување да вработува и отпушта вработени“, рече Алсап.

Синдикатите и непрофитните организации поднесоа тужба минатата недела и побараа судска забрана. Тие сметаат дека Службата за човечки ресурси нема овластување за откази. Тие, исто така, тврдат дека отказите се засновани на лага за наводно лошо работење на вработените.

Погодени се десетици илјади државни службеници

Владините адвокати тврдеа дека Службата за човечки ресурси самата не наредила отпуштања, туку побарале од релевантните федерални агенции да утврдат дали работниците кои се на пробен период се соодветни за да им се продолжат договорите за работа. Тие аргументираа дека вработените на пробно време немаат гаранција за вработување.

Откако ја презеде функцијата во јануари, Трамп брзо ги реструктуира и намалува федералните агенции. Неговиот советник, технолошкиот милијардер Илон Маск, игра водечка улога во неговиот владин оддел за државна ефикасност (ДОГЕ). Од отпуштањата во федералните агенции се погодени десеттици илјади луѓе.