Париз: Договор за безбедносни гаранции за Украина

Западните поддржувачи на Украина на состанок во Париз постигнаа согласност за широка рамка на гаранции за воена безбедност на земјата нападната од Русија. Под водство на францускиот претседател Емануел Макрон и британскиот премиер Кир Стармер, 35 шефови на држави и влади, некои лично, а некои преку видео врска, разговараа за тоа како би можела да се осигура безбедноста на Украина по евентуалното завршување на војната.

Според украинскиот претседател Володимир Зеленски, кој исто така учествуваше на состанокот, постои согласност во рамките на „Коалицијата на волните“ за општата рамка на безбедносните гаранции. Силна украинска армија е од централно значење, рече тој по состанокот на групата во Париз. Понатаму, сите се согласија дека Русија отфрла каква било мировна иницијатива.

Макрон: 26 земји сакаат да испратат војници

Според Макрон, 26 земји се подготвени да распоредат војници за осигурување на евентуалниот прекин на огнот или мир во Украина. Овие земји формално се обврзаа да стационираат трупи во Украина како поддршка или да одржат присуство на копно, на море или во воздух за да ја зајакнат Украина по завршувањето на војната и да го осигуруваат евентуалниот мир, рече Макрон по консултациите. Тој не ги именуваше земјите.

Други држави сè уште размислуваат дали да учествуваат во безбедносните гаранции, рече Макрон. „Овие трупи немаат ниту волја, ниту цел да водат војна против Русија, туку се наменетi да го осигураат мирот и да испрати јасен стратешки сигнал.“

Нема германски планови за воен ангажман

За Германија, пак, приоритет е опремувањето на украинските вооружени сили за земјата да може да се одбрани. Владата ќе одлучи за сè друго дури по евентуалниот прекин на огнот.  Меѓутоа, Берлин го отфрла распоредувањето на војници од Бундесверот во Украина, барем не во овој момент. Сепак, според медиумските извештаи, германската влада планира да ја зајакне воздушната одбрана на Украина, да ја поддржи земјата во изградбата на вооружени системи и да обезбеди дополнителна помош во обуката на украинските војници. Сето ова е под услов САД да продолжат со своето учество во Украина. Канцеларот Фридрих Мерц учествуваше на состанокот во Париз само преку видео врска. Според владиниот портпарол Штефан Корнелиус, тој ѝ се закани на Русија со понатамошни казнени мерки доколку нема напредок во преговорите за прекин на огнот. „Доколку руската страна продолжи да играна време, Европа ќе го засили притисокот со санкции за да ги зголеми шансите за дипломатско решение“, рече Корнелиус.