Трамп сака да го реактивира затворот Алкатраз

Американскиот претседател Доналд Трамп сака повторно да го активира и прошири поранешниот затвор со максимална безбедност Алкатраз во американската сојузна држава Калифорнија, како што објави на својата интернет платформа Truth Social.

Америка предолго е измачувана од „злобни, насилни криминалци“,  како што Трамп го нарече  „талогот на општеството кој никогаш нема да предизвика ништо друго освен беда и страдање. Кога сè уште бевме сериозна нација, не се двоумевме да ги затвориме најопасните криминалци и да ги држиме подалеку од секого кому што би можеле да му наштетат. Така треба и да биде“.

Доналд Трамп  не само што сака повторно  да го отвори Алкатраз,  туку сака и затворот „значително да го прошири“ и реконструира за да служи како „симбол на законот, редот и правдата“. Портпаролот на Бирото за затвори, кое е одговорно за управување со федералните затвори  во САД,  изјави за новинската агенција АП дека агенцијата „ќе ги почитува сите наредби од претседателот“.

Портпаролот не коментираше дали рестартирањето воопшто ќе биде изводливо. Затворањето на Алкатраз во 1963 година беше оправдано со распаднатата инфраструктура и високите трошоци за снабдување на островската институција, бидејќи сè, од гориво до храна требаше да се донесе со брод.

Затворот се сметаше за место од каде е невозможно бегство поради силните океански струи и студените води на Тихиот Океан што го опкружуваат. Во затворот биле сместени некои од најозлогласените криминалци на нацијата, вклучувајќи ги и закоравените криминалци Ал Капоне и Џорџ „митралез“ Кели.

Во текот на 29-те години во кои работел затворот, според ФБИ, се обиделе да побегнат вкупно 36 мажи. Речиси сите биле фатени или не го преживеале обидот за бегство. Островот Алкатраз во заливот Сан Франциско сега функционира како туристичка атракција и е под контрола на Службата за национални паркови.