Сѐ повеќе доброволци за германската армија

Доброволно пријавување во Бундесверот, учење како се маршира и спиење во кревет на кат во касарна? Многу млади Германци не можат ни да го замислат тоа. Том може. 23-годишникот од Ерфурт размислува да му се приклучи на Бундесверот. „Комбинацијата од другарство и тимски дух ме фасцинира“, вели тој за ДВ. „И сакам понатаму да се развивам“.

Затоа Том - облечен во црна маица и со атлетска фигура - седи во канцеларијата за кариерно советување на Бундесверот во Ерфурт. Таа е сместена во трговски центар помеѓу супермаркет и теретана. Заинтересираните како него се добредојдени, бидејќи Бундесверот очајно бара персонал. Мотото е: Никој да не се одбие! Дури и оние што ќе влезат без закажан термин можат, со малку среќа, брзо да добијат совет. Или барем маслинесто-зелен информативен леток со донекаде патетичен натпис: „Тука ја обезбедувате Германија и вашата иднина“.

Прва консултација со кариерниот советник

Пред да донесе одлука, на Том му се потребни некои информации. Униформираниот кариерен советник одвојува време за него и љубезно го прашува за неговото професионално искуство и цели. Том неколку години работи во здравствениот сектор и моментално е на магистерски студии.

Тој го познава Бундесверот од пракса што ја извршувал како студент. Многу за тоа му раскажувал и пријател кој е војник. Служењето во вооружените сили или мисии во странство не би било проблем за Том. „Сакам и да ѝ вратам нешто на мојата земја. Веќе имав многу корист, како што е на пример бесплатното образование.“

Со околу 182.000 војници и 80.000 цивилни вработени, Бундесверот е еден од најголемите работодавци во Германија. Привлекува заинтересирани со широк спектар на програми за обука и студиски насоки. „Постојат можности што можеби не се достапни во приватниот сектор“, вели Том. Тој размислува дали првично да служи доброволно воена служба или веднаш да потпише договор на неколку години.

Центар за проценка во касарната

Касарната „Леберфелд“ се наоѓа на околу три километри од Канцеларијата за кариерни совети. Личните карти се проверуваат на влезот. Потоа се оди во Кариерниот центар на Бундесверот - еден од 15-те ширум Германија. Тука, сите кандидати од покраините Тирингија и Саксонија мора да полагаат серија тестови. Резултатите одредуваат дали Бундесверот ќе ги прифати или не.

Во теретаната, две момчиња моментално го полагаат тестот по физичка подготвеност. Топло е, сонцето сјае низ прозорците. Двајцата енергично вртат педали на ергометри за да го постигнат пропишаното ниво на оптоварување. Претходно имале спринт во таа просторија и се тегнеле и кревале на вратило додека на челата не им се појавиле капки пот.

Иако потребата од персонал е голема, Бундесверот не го прифаќа секого. Здравјето и физичката кондиција мора да бидат добри. Таков мора да биде и нивниот личен став. Ако кандидатот не се придржува до демократскиот поредок и сите негови принципи, процесот завршува тука.

„Околу еден од пет кандидати не успеваат“, резимира полковник Ким Фрерихс, кој раководи со Кариерниот центар Ерфурт. Сепак, тој е многу задоволен од моменталните бројки: Бројот на апликации и вработувања годинава е зголемен за околу 20 проценти. Ова е „исто така последица од војната во Украина“, вели Фрерихс. Трендот од 2024 година продолжува: Минатата година, Бундесверот доби речиси една петтина повеќе апликации отколку во претходната година.

Можат ли доброволците да ја задоволат големата побарувачка?

Значи, Бундесверот повторно расте по долгогодишно намалување. Но, не секој нов регрут останува во армијата. Освен тоа, многу војници одат во пензија. Дали сè уште ќе биде можно да се регрутираат до 60.000 дополнителни војници во наредните години? Таков е планот на министерот за одбрана Борис Писториус. Тој тоа го оправдува со заканата од Русија и зголемените барања на НАТО.

И покрај оваа амбициозна цел, министерот за одбрана засега се држи до доброволна служба. Тој сака да ја направи воената служба попривлечна, првенствено преку подобри плати.

Во иднина, сите 18-годишници ќе добиваат писмо од Бундесверот. Мажите мора, а жените можат, да го пополнат и вратат прашалникот. Тој содржи прашања за нивното здравје и подготвеност за извршување воена служба. Лекарскиот преглед, физички преглед, исто така постепено ќе биде воведен за сите млади мажи. Ким Фрерихс, човек со практично искуство, верува дека без такви „задолжителни елементи“ работите нема да функционираат целосно.

Во случај „благата принуда“ да не е доволна, Писториус веќе презема мерки на претпазливост: Тој има можност повторно да ја активира регрутацијата во краток рок, што е запишано во планираниот нов Закон за воена служба. Оваа опција би требало да стапи на сила ако не се најдат доволно доброволци или ако поради закани ситуацијата се влоши. Се очекува предлог законот да биде разгледан од страна на Владата на крајот на август.

Подобар имиџ, повеќе кандидати

Назад во канцеларијата за кариерно советување во центарот на Ерфурт. Што ги интересира младите луѓе што се тука во врска со Бундесверот? Кариерниот советник Тони Бауман, кој исто така го спроведе интервјуто со Том, вели дека често го прашуваат дали можат да спортуваат или да добијат возачка дозвола.

Парите се исто така тема за потенцијалните кандидати, од кои некои се појавуваат со своите родители. „Во тој дел не мора да се криеме“, вели Бауман. „Ако некој сака да служи доброволно воена служба веднаш по училиште, тука му се обезбедуваат 1.800 евра нето, а исто така му се обезбедува и бесплатно сместување, бесплатен превоз со воз и бесплатна медицинска нега, тоа е многу привлечно.“

Имиџот на Бундесверот, исто така, игра улога. Ова значително се подобри откако сојузната влада инвестираше многу пари за подобро опремување на војниците. Сознанието дека Бундесверот е многу добро опремен и технолошки современ, вели Бауман, дефинитивно е дополнителна мотивација за кандидатите.