До Омбудсманот се повеќе претставки за загадувањето

На адресата на Народниот правобранител во Северна Македонија пристигнуваат се повеќе претставки од граѓани коишто се однесуваат на животната средина. Народниот правобранител Насер Зибери вели дека станува збор за претставки од сите сфери на животната средина, а не само за бучавата, пракса позната низ годините.

„Добивме претставки за загадувањето на воздухот, водата, но и започвата“, вели Зибери.

Народниот правобранител формира предмет по сопствена иницијатива, за загадувањето на воздухот во 15 општини чии градови се на врвот на листата најзагадени градови во Европа и во светот.

„Од добиените одговори произлезе дека сите општини преземаат мерки за справување со загадениот воздух, иако реалноста тоа не го потврдува. Затоа, оваа 2025 година, во соработка со невладините организации, со кои потпишавме меморандум, повторно ќе работиме на оваа тема“, порача Зибери на прес-конференција во Скопје.

Најголемиот број поднесени претставки до Народниот правобранител минатата година (408 или 15,08 проценти) биле од областа на граѓанските состојби, каде се констатирани најголем број повреди, особено со издавањето на пасошите што беше проблем за македонските граѓани во првата половина на 2024 година.

Граѓаните во 2024 година се жалеле и за повреда на права од работните односи, како и од областа на урбанизам и градба, а кај потрошувачките права најизразен бил проблемот со високи фактури за потрошена електрична енергија.  Народниот правобранител лани добивал голем број претставки и од граѓани кои станале „жртви на правните лавиринти и правна нејаснотија“, откако Собранието ги изгласа измените на законите за облигациони односи и за извршување, а судовите и извршителите одбиле нив да ги спроведат во  пракса.

Омбудсманот лани постапувал по 3.148 претставки, од кои 443 предмети биле пренесени од претходната година.