САД: Царини од малку над 10 проценти за помалите земји

Претседателот Доналд Трамп вчера (15 јули, 2025) им изјави на новинарите дека планира да воведе царини од повеќе од 10 отсто за помалите земји. „Веројатно ќе ставиме една царинска стапка на сите нив“, рече Трамп, додавајќи дека тоа би можела да изнесува „малку над 10 отсто“ за стоките од најмалку 100 земји. „Наскоро ќе испратиме писмо... тука зборуваме за многу земји кои се многу помали“, рече тој.

Министерот за трговија Хауард Лутник додаде дека повеќето земји чии стоки ќе бидат царинети по овие стапки ќе бидат во Африка и на Карибите, места кои генерално имаат релативно скромни нивоа на трговија со САД и би биле релативно незначителни за целите на Трамп за намалување на трговските нерамнотежи со остатокот од светот.

Трамп, обраќајќи се на новинарите по пристигнувањето од настан во Питсбург, рече дека е многу задоволен од „едноставните договори“ кои веќе се објавени и кои поставија униформни царински стапки за повеќе од 20 земји, како и дека наскоро ќе ги решат царинските давачки и за преостанатите земји.

Месецов, претседателот испрати писма до околу дваесетина земји и Европската Унија, кои едноставно ја утврдија царинската стапка која ќе се применува од 1 август.Овие земји најчесто се соочија со царини за стоки блиски до стапките што ги објави американскиот претседател на 2 април, чие воведување на историски високи цариниза увоз на САД предизвика паника на финансиските пазари, која пак го наведе Трамп да одреди 90-дневен преговарачки период кој истече на 9 јули.

Трамп, исто така, рече дека „веројатно“ ќе најави царини за фармацевтски производи „на крајот на месецот“. Претседателот рече дека ќе започне со пониска царинска стапка и ќе им даде на компаниите една година да изградат домашни фабрики пред да се соочат со повисоки царински стапки за увоз. Трамп рече дека компјутерските чипови ќе се соочат со сличен стил на царини.