Рекордна жештина во Медитеранот - во Турција 50,5 степени

Во турскиот град Силопи, близу границата со Ирак и Сирија, се измерени рекордни 50,5 степени Целзиусови – највисока температура некогаш забележана во земјата. Досегашниот рекорд изнесуваше 49,5 степени и беше забележан во август 2023 година.

Турската метеоролошка служба соопшти дека дури 132 станици во земјата измериле температурни рекорди за јули. Во некои региони, температурите се и до 12 степени над просекот. Болниците бележат пораст на случаи на дехидрација, топлотен удар и труење со храна, пренесува весникот Хурријет.

Пожари и евакуации низ Турција

Високите температури, силните ветрови и сувото земјиште создадоа идеални услови за појава на пожари низ целата земја. На југот, во Анталија, огнот се приближи до станбени згради, што доведе до евакуации во центарот на градот и во округот Аксу. Во петокот во Анталија беа измерени 46,1 степен – највисока јулска температура во овој град од 1930 година.

Пожари се пријавени и во провинциите Карабик, Сакарија и Билечик на северот, каде се евакуирани повеќе села. Во провинцијата Ескишехир загинаа 13 лица во обид да го изгаснат огнот.

Во провинцијата Бурса на запад, пожарите опасно се приближија до населени места. Евакуирани се повеќе од 1.700 луѓе, како и едно засолниште за животни. Во гаснењето се вклучија и локални земјоделци, носејќи вода со трактори.

Во Карабик, пожарникарите четврти ден по ред се борат со огнот. Евакуирани се 18 села, а причината за пожарот сѐ уште не е позната. Гасење од воздух не е возможно во текот на ноќта поради безбедносни причини. Министерството за шумарство соопшти дека наутро биле ангажирани три авиони и три хеликоптери, а вкупно над 1.000 луѓе се на терен.

Претседателот Реџеп Таип Ердоган изјави дека „Турција се соочува со вистинска катастрофа“ и наведе дека со пожарите се борат 25.000 луѓе, со поддршка од 27 авиони, 105 хеликоптери и 6.000 возила.

Поради недостиг на вода, локалните власти воведоа ограничувања во потрошувачката во повеќе места, вклучувајќи го и популарното летувалиште Чешме на западниот брег.

Грција бара помош од ЕУ во борбата со пожарите

Топлотниот бран, кој трае од почетокот на неделата, ги зафати и другите земји од источниот Медитеран – Грција, Кипар и Албанија.

Големи пожари беснеат на островите Евија, Крит, Китира и на полуостровот Пелопонез. Многу луѓе завршија во болница поради труење со чад. Северно од Атина се уништени многу куќи, а селата Крионери и Дросопиги беа евакуирани. Иако веќе нема активен фронт на пожар, жариштата постојано се распламтуваат. Регионот е без струја, јави грчкиот јавен сервис.

Според податоците од полицијата, ангажирани се 145 пожарникари, бројни волонтери, 44 противпожарни возила, седум хеликоптери и десет авиони.

Портпаролот на противпожарната служба, Василис Ватракогианис, изјави дека Грција побарала помош од ЕУ и најави пристигнување на два канадери од Италија. Иако земјата располага со над 80 летала за гасење пожари, тие се стратешки распоредени поради постојаната опасност од нови пожари. Во меѓувреме, пожарникарски сили од Чешка веќе пристигнаа да помогнат.

Топлотен бран без крај

Според прогнозите на метеоролошките служби, топлотниот бран ќе продолжи уште неколку дена, дополнително отежнувајќи ја борбата со пожарите и загрозувајќи го здравјето на населението и туристите.