Парада во Москва: Путин ја оправдува војната против Украина
9 мај 2025
На традиционалната воена парада на Црвениот плоштад, шефот на Кремљ, Владимир Путин, ја изедначи својата агресорска војна против Украина со одбраната на Советскиот Сојуз во Втората светска војна од нацистичка Германија. „Русија останува непремостлива пречка за нацизмот, русофобијата и антисемитизмот и ќе се бори против ексцесите што ги прават следбениците на овие агресивни деструктивни идеи“, рече Путин во својот говор. Вистината и правдата се на страната на Русија, рече шефот на Кремљ, осврнувајќи се на својата војна во Украина. Тој додаде дека цела Русија ги поддржува борците на „специјалната воена операција“ - како што Кремљ ја нарекува својата инвазија на соседната земја.
Путин индиректно му противречи на Трамп
Путин нагласи дека војниците на Советската армија дале одлучувачки придонес во победата над Хитлерова Германија во Втората светска војна. Со тоа, тој индиректно му противречеше и на американскиот претседател Доналд Трамп, кој претходно го означи придонесот на американската војска како клучен. Сепак, тој призна дека отворањето на втор фронт во Европа по уништувањето на големи делови од Вермахтот во Советскиот Сојуз ја забрзало победата.
Иако не ги именуваше поединечно сојузниците Франција, Велика Британија и САД, Путин го нагласи нивниот придонес во војната но особено придонесот на Кина. Кинескиот претседател и лидер на партијата, Ши Џинпинг, стоеше како највисок гостин од странска држава, веднаш до Путин на подиумот. Од друга страна, поради руската војна, официјалните претставници на западните сојузници не присуствуваа.
Како единствен шеф на влада на земја членка на ЕУ и на НАТО, Словакот Роберт Фицо беше во Москва. На парадата во Москва пред околу 10.000 војници присуствуваше и српскиот претседател Александар Вучиќ.