Избори во Романија: Отфрлена кандидатурата на Георгеску

На помалку од два месеци пред повторувањето на претседателски избори во земјата, романската изборна комисија ја отфрли кандидатурата на екстремно десничарскиот и проруски политичар Калин Георгеску. Одлуката предизвика бес кај неговите поддржувачи.

Изборната комисија само соопшти дека кандидатурата е отфрлена без никакво образложение.

Георгеску, кој е фаворит  во анкетите пред претседателските избори во мај со околу 40 отсто поддршка од глаачите, сепак може да поднесе жалба до Уставниот суд.

Тој на платформата Х оцени дека тоа е „директен удар за демократијата во светот“.

„Европа сега е диктатура, Романија живее под тиранија“, напиша Ѓорѓеску.

По најавата на Изборната комисија, неколку стотици приврзаници на Ѓорѓеску се собраа пред зградата на комисијата. Полицијата била принудена да ги растера со солзавец, а еден од полицајците бил повреден од тап предмет фрлен кон безбедносните сили.

Романија е во превирања уште од првиот круг на претседателските избори, одржани на 24 ноември, што го донесе на политичката сцена тогаш практично непознатиот Калин Георгеску.

Во редок потег во земја од Европската унија, Уставниот суд  на Романија го поништи гласањето по наводите за руско мешање, а нови избори беа закажани за мај во многу тензична атмосфера.

Десетици илјади поддржувачи на Георгеску излегоа на улиците во последниве недели, додека романските власти предупредија на „серија хибридни акции“ од страна на Москва.