Напаѓач уби четири лица и се самоуби во зграда во Њујорк
29 јули 2025
27-годишен маж застрелал најмалку четири лица во голема деловна зграда во Њујорк, а потоа се самоубил. Меѓу загинатите е и полицаец од њујоршката полиција, кој бил во лобито на облакодерот. Градоначалникот Ерик Адамс го нарече „бесмислен чин на насилство“ чии околности сè уште се истражуваат.
Според шефицата на њујоршката полиција, Џесика Тиш, видео снимките од надзорните камери го покажаа вооружениот човек како излегува од автомобил на Парк Авенија во центарот на Менхетен во понеделникот вечерта и оди кон деловната зграда. Вооружен со автоматска пушка, тој влегол во зградата и веднаш отворил оган.
Зградата се наоѓа на Парк Авенија помеѓу 51-ва и 52-ра улица во Менхетен. Инцидентот се случил околу 18:30 часот (локално време).
Според Тиш, сторителот е 27-годишник од пустинската метропола Лас Вегас. Неговото возило било регистрирано во Невада и во него биле најдени неколку оружја, муниција и лични предмети. Според истрагата, напаѓачот патувал низ САД со автомобил во деновите пред злосторството, последно пропатувал низ Колорадо, Небраска, Ајова и Њу Џерси, пред да стигне до Њујорк.
Во облакодерот во центарот на Менхетен се наоѓаат канцеларии на инвестициската фирма Блекстоун и Националната фудбалска лига (НФЛ), меѓу другите. Зошто сторителот ја избрал токму оваа зграда, засега останува нејасно. Американската државна обвинителка Пам Бонди објави на X дека ФБИ помага во истрагата.
Во понеделникот, во САД се случи уште еден сериозен насилен инцидент со оружје. Три лица загинаа во пукотница пред казино во Рино, Невада, според локалните власти. Двајца други повредени лица се хоспитализирани и се наоѓаат во критична здравствена состојба. Осомничениот стрелец е уапсен и исто така претрпел прострелна рана. Мотивот за пукотницата останува нејасен.
Огненото оружје е лесно достапно и го има во голем број кај населението во САД. Според американските Центри за контрола и превенција на болести, десетици илјади луѓе умираат секоја година како резултат на повреди од огнено оружје. Меѓу децата и адолесцентите, тие се меѓу водечките причини за смрт - според податоците од 2023 година, дури и пред сообраќајните несреќи.
По насилните инциденти на јавни места, секогаш се водат дебати за построги закони за оружје. Сепак, досега недостасува опиплив напредок, првенствено поради отпорот од Републиканците и лобито за оружје.