По бурата од протести во Украина: Нов антикорупциски закон

По бранот протести, украинскиот парламент донесе закон со кој се враќа независноста на две антикорупциски агенции. Претседателот  Володимир Зеленски   го поднесе предлог-законот по протестите,  првенствено од млади луѓе во големите украински градови, против претходно донесениот, контроверзен закон. Притисокот од западните земји и  Европската Унија врз Зеленски беше клучен за промената на законот.

Парламентарната седница беше емитувана во живо на телевизија за прв пат по  руската инвазија во февруари 2022 година.

Протестите беа предизвикани од набрзина донесен закон  минатата среда. Со  него Националното биро за борба против корупцијата и Обвинителството за борба против корупцијата практично беа ставени под контрола на Канцеларијата на државниот обвинител. Двете агенции го поддржуваат новиот закон, кој ја враќа нивната независност. Сепак, вработените со пристап до државни тајни сега ќе бидат обврзани да се подложуваат на редовни полиграфски тестови. Тие ќе бидат испрашувани за можна соработка со  Русија,  воениот непријател.

И двата тела беа создадени во 2015 година со финансирање од Западот за борба против поткупот и непотизмот меѓу високите државни службеници и политичарите.

Сиромашната Украина одржува систем на антикорупциски агенции, паралелен со обвинителството и полицијата, што го бара Западот. И покрај новосоздадените агенции по прозападниот државен удар во 2014 година, земјата останува една од најкорумпираните држави во Европа, според невладината организација „Транспаренси интернешнл“.

Пратениците во парламентот го усвоија законот денеска (четврток, 31.07.2025) со 331 глас „за“ и 0 „против“.