Протести во Романија за десноекстремниот Георгеску

Демонстрантите во Букурешт маршираа низ центарот на градот и побараа, меѓу другото, оставка од актуелниот претседател Клаус Јоханис. Освен тоа, демонстрантите побараа Уставниот суд да ја повлече својата одлука со која го прогласи првиот круг од изборите на крајот на ноември за неважечки и нареди прегласување. На демонстрации повика десноекстремната партија АУР.

Георгеску изненадувачки освои најмногу гласови во првиот круг на гласање. Уставниот суд го оправда поништувањето на изборите со тврдењето дека целиот изборен процес бил нерегуларен. Меѓу другото, судот тврдеше дека гласачите биле изманипулирани со незаконски повластен третман на еден кандидат на социјалните мрежи.

Георгеску порано беше член на екстремно десничарската АУР, но по еден судир ја напушти партијата. Тој ги застапува проруските позиции, сака да ја прекине романската поддршка за Украина, шири теории на заговор и ги велича романските фашисти од периодот пред 1945 година познат како „Легионери“.

Новите претседателски избори во Романија треба да се одржат на 4 мај. Евентуалниот втор круг од изборите е планиран за 18 мај.