Најтежок степен на глад во делови од Појасот Газа

Во северниот дел на Појасот Газа е прогласен глад. Потребните критериуми според иницијативата ИПЦ (Интегрирана класификација на фази на безбедност на храната) се исполнети, ова важи и за градот Газа.

Се наведува дека 132.000 деца под петгодишна возраст се изложени на ризик од неухранетост. Од нив, 41.000 се сметаат за критично болни - двојно повеќе од бројот во мај оваа година. На својот X профил, ИПЦ вели дека  гладот е предизвикан од човечки фактор и може да се заврши ако во  Појасот Газа  стигне доволно храна.

Прв пат е прогласен глад на Блискиот Исток

Според Светската здравствена организација (СЗО), ова е прв пат да е прогласен глад на Блискиот Исток. „Итно прекинување на огнот и прекин на конфликтот се клучни услови за да се овозможи непречен влез на големи количини хуманитарна помош што спасува животи“, соопшти ИПЦ.

Координаторот на ОН за итна помош, Том Флечер, го критикуваше акумулирањето храна на границите и апелираше до израелскиот премиер  Бенјамин Нетанјаху:  „Да дозволиме храната и другата помош да течат слободно и во голем обем“.

Меѓутоа, по објавувата на ИПЦ, израелското Министерство за надворешни работи демантираше:  „Нема глад во Газа“.  Владата на  Израел не ги прецизираше конкретните точки што ги оспорува.

Критериумите се строги

Пред да може да се прогласи глад, мора да се исполнат три критериуми: ако најмалку 20 проценти од домаќинствата се погодени од екстремен недостиг на храна, ако најмалку 30 проценти од децата страдаат од акутна неухранетост и ако најмалку двајца возрасни или четири деца на 10.000 жители умираат секој ден од  глад или комбинација од неухранетост и болести.

Како што изјави Жан-Мартин Бауер од Светската програма за храна на прес-конференција во Женева, сите три се применливи во случајот со Газа. Скалата на ИПЦ идентификува пет нивоа на несигурност во храната за една земја или регион. Најтешко ниво е петтото: катастрофа од глад“.

Се што е под ова ниво се нарекува „криза со храна“. Досега, нивото четири („вонредна состојба“) се однесуваше на целиот Појас Газа.

Иницијативата на ИПЦ е основана во 2004 година. Во неа членуваат десетици агенции на ОН и организации за помош.

ИПЦ е одговорна за проценка на глобалната состојба со гладот. Според ИПЦ, во последните 15 години се потврдени четири кризи во категоријата катастрофа/глад: во Сомалија во 2011 година, во Јужен Судан во 2017 и 2020 година и во Судан во 2024 година.