Претставник на Кремљ за првпат на разговори во САД

Шефот на рускиот државен фонд за директни инвестиции (РФДИ), Кирил Дмитриев, по пристигнувањето во Вашингтон сподели медиумски извештај на својот канал на Телеграм, според кој Москва побарала од американскиот претседател Доналд Трамп „да укине дел од санкциите - во рамки на преговорите за прекин на огнот со посредство на САД“.

Преговорите за Украина во ќорсокак

На новинарско прашање, Трамп го потврди присуството на руски претставник во Вашингтон, но не сакаше да го именува. Во моментов, преговорите за прекин на огнот во војната во Украина се во ќорсокак, се вели во извештајот што го сподели Дмитриев. Трамп наводно е лут поради недостатокот на напредок.

Американскиот претседател повеќепати изјави дека сака да постигне крај на војната. Дмитриев рече дека затоа е во Вашингтон по наредба на рускиот претседател Владимир Путин. За време на телефонскиот разговор со Трамп во март, Путин изрази подготвеност за прекин на огнот. Меѓутоа, тој постави услови, вклучувајќи и укинување на некои санкции.

Дмитриев гледа подготвеност за компромис кај САД

Дмитриев, кој и самиот долго време е под санкции поради војната, наводно советува како специјален претставник на рускиот претседател за економска соработка со други земји, меѓу другите и претставникот на Трамп, Стив Виткоф. Обновата на односите меѓу Русија и САД не е лесно и може да се случи само постепено.

И покрај тоа, Дмитриев е оптимист: „Без сомнение, забележуваме позитивна динамика во нашите односи“, го цитираа руските агенции по средбата со претставниците на администрацијата на Трамп во Вашингтон. „Ќе бидат потребни уште серија состаноци за да се испеглаат сите наши разлики. Сепак, главна работа е дека двете земји имаат позитивен, креативен став.“

Јасно е дека сегашната американска администрација е посветена на решавање на проблемот, за разлика од поранешниот претседател Бајден, рече Дмитриев. „Тие се однесуваат со голема почит, поставуваат многу прашања и наоѓаат компромиси.“