Уапсен осомничениот атентатор од Минесота

Полицијата интензивно трагаше по осомничениот, а сега тој е уапсен во јужна Минесота: По смртоносното пукање врз политичарка и нејзиниот сопруг во околината на Минеаполис, полицијата го фати осомничениот сторител. Гувернерот сојузната држава Тим Волц ја потврди веста за апсењето. Властите претпоставуваат дека зад делата стои политички мотив.

Успешна потрага по 57-годишниот маж

Бегалецот бил „фатен без употреба на сила“ во неделата вечерта (по локално време) во градот Грин Ајл, југозападно од Минеаполис, соопштија властите. Осомничениот сторител е 57-годишен маж, кој, според истражувањата на американските медиуми, работи во безбедносниот сектор. Пред апсењето на осомничениот, во близина бил пронајден автомобил за кој се верува дека му припаѓа.

Смртоносно пукање врз американска демократка и нејзиниот сопруг

Во раните утрински часови во саботата (по локално време), вооружениот сторител ја уби демократската пратеничка Мелиса Хортман, која била член на парламентот на Минесота, и нејзиниот сопруг Марк во нивниот дом во градот Бруклин Парк. Во друг напад во блискиот Шамплин, демократскиот сенатор од парламентот на сојузната држава, Џон Хофман, и неговата сопруга Ивет беа застрелани и тешко повредени. Потоа, сторителот побегнал, по што беше покрената голема потрага. Според „Њујорк Тајмс“, убиената политичарка одиграла клучна улога во 2023 година при усвојувањето закони кои го проширија правото на абортус, легализираа марихуаната за рекреативна употреба и ги обврзаа работодавците да нудат платено боледување.

Список со имиња

Припадниците на силите за спроведување на законот пронајдоа во возилото на осомничениот, покрај поголемо количество муниција, и список со имиња на неколку функционери. Според американската телевизија Си-Ен-Ен, на списокот биле, меѓу другото, политичари од Минесота и други сојузни држави на САД, како и поборници за правото на абортус. Властите, затоа, стравуваа дека може да бидат загрозени и други луѓе.