Откриен магацин на диво со небезбедна храна

Во магацин кој работел на диво во скопската населба Маџари се откриени над 40 илјади килограми небезбедна храна. Станува збор за сувомесни и кондиторски производи за кои е издадено решение да се уништат. Импровизираниот магацин за храна бил откриен при вонреден инспекциски надзор на Агенцијата за храна и ветеринарство (АХВ), која во соработка со полицијата извршила проверка во див објект каде била складирана храна од животинско и од неживотинско потекло.

„Во објектот кој служел како магацин за храна, а кој не е регистриран во АХВ како оператор, инспекциските служби на Агенцијата нашле 40.751 килограми небезбедни производи (сувомесни и кондиторски производи), за кои е издадено решение и кои се нештетно уништени“, соопшти АХВ.

Дополнително, во дворот на дивиот магацин, од страна на МВР запленето е комбе, во кое се пронајдени 360 килограми небезбедни сувомесни и кондиторски производи, кои исто така се нештетно уништени.

„За расчистување на овој криминал, во рамки на постапката, а со цел прибавување на сите потребни информации, АХВ спроведе контрола и кај увозникот на небезбедните сувомесни производи затекнати во дивиот магацин. Обезбедена е целокупната документација за реализираните увози, како и за следливоста на пратките, за период од последните шест месеци“, соопштија од Агенцијата за храна.

Зголемено количество на фосфати 

Со анализа на документацијата утврдено е дека дел од производите биле со зголемено количество на фосфати, што било потврдено со лабораториски наоди од земени мостри од пратките кои се увезувале во Северна Македонија, а кои биле анализирани во рамки на мониторинг програмата за храна од увоз на АХВ.

Пратките со небезбедни сувомесни производи биле складирани кај дистрибутерот (во дивиот магацин), кој имал законска обврска нештетно да ги уништи, но, тоа не го сторил, односно за нив од страна на овластена депонија му било издадена фиктивна потврда за уништување на небезбедните производи, велат од Агенцијата за храна. 

При спроведениот инспекциски надзор во објектите на дистрибутерот, затекнати биле сувомесни производи во вкупна количина од 40.053 килограми, кои биле ставени под официјален надзор, а подоцна во рамки на постапката и нештетно уништени. За сторен прекршок неусогласеност со барањата за безбедност на храната и за преземените постапки за спречување на ризик по здравјето на потрошувачите, на правното лице кое стопанисувало со дивиот магацин за храна, изречена му е казна од 18 илјади евра во денарска противвредност. Со 1.500 евра во денарска противвредност, казнето е и одговорното лице на операторот со храна.