Иранската Револуционерна гарда планирала напад во Берлин?

Кога Али С. дошол во посета на Германија, веќе бил очекуван. По дојава од странска разузнавачка служба, Службата за заштита на уставниот поредок (БфВ) се заинтересирала што прави 53-годишниот Данец со авганистанско потекло во Германија, поточно во Берлин. Со денови, разузнавачите се обидувале да го следат секој негов потег.

Според безбедносни извори, тие не биле целосно успешни. Сепак, наводната туристичка програма на човекот во Берлин ги исполнила разузнавачите со зголемена загриженост. Тие имале впечаток дека Али С. целно „посетува“ еврејски и израелски институции. На пример, кошер супермаркети и места поврзани со еврејската заедница во Берлин и државата Израел. Али С. наводно бил заинтересиран и за конкретни луѓе во Берлин кои го симболизираат еврејскиот живот во Германија.

Шпион, терорист или сепак само турист?

Сојузниот обвинител во моментов го смета ова однесување за сомнителна „активност на разузнавачки агент“ и затоа води истрага против Али С. На барање на Обвинителството, тој беше уапсен минатиот четврток (26.06) во Архус, Данска, вториот по големина град во земјата. Иако лицето со авганистански корени е дански државјанин, Данска се чини дека нема никаков посебен интерес за него. Неговата екстрадиција во Германија, според Берлин, е „формалност“.

Сојузното обвинителство во моментов одбива да го коментира случајот, повикувајќи се на тековните истраги. Според истражувањето на АРД и СВР, досегашните наоди укажуваат на можно планирање напад. Сепак, сојузните обвинители во моментов сметаат дека само сомневањето за шпионажа е правно неоспорно. Доказите што се достапни во моментов се очигледно недоволни за да се докаже планирањето напад и со тоа да се покрене постапка за тероризам. Сепак, дури и за „разузнавачка активност“ се заканува казна до пет години затвор, а во некои случаи дури и десет години затвор.

Наредба од Револуционерниот совет?

Не се само можните еврејски цели во Берлин тие што ја прават постапката експлозивна. Загриженост на германските безбедносни власти им предизвикува и наводниот налогодавач. Иследниците претпоставуваат дека Али С. добил наредба директно од Кудс-бригадите во Иран, елитна единица на Иранската револуционерна гарда. Кудс-силите се специјална единица која спроведува (пара)воени операции и шпионажа во странство.

Уште во 2017 година, германските безбедносни власти истражуваа можен обид за шпионажа во Германија по налог на Кудс-силите. Во тоа време, се вели, цел бил Рајнхард Робе (СПД), комесар на германскиот Бундестаг за вооружените сили. Сепак, ова веројатно било затоа што тој бил и претседател на Германско-израелското друштво. Постапката во тоа време резултираше со затворска казна од повеќе од четири години за обвинетиот.

Интересна паралела: Според истражувањето на СВР и АРД, Германско-израелското друштво кое беше засегнато во тоа време е исто така една од потенцијалните цели во тековниот случај.

 

Автори на текстот: Михаел Геченберг (АРД) и Холгер Шмит (СВР)