Хеликоптер се урна во реката Хадсон во Њујорк

Во хеликоптерска несреќа во Њујорк загина петчлено семејство од Шпанија и пилотот на хеликоптерот, соопшти градоначалникот на Њујорк, Ерик Адамс. Хеликоптерот, кој превезувал туристи во обиколка на градот, се урна во реката Хадсон. Според официјални наводи, две лица биле префрлени воо болница, каде им подлегнале на повредите.

Хеликоптерот полетал од хелиодром на јужниот дел на Менхетен во четвртокот во 14:59 часот (по локално време), изјави началничката на њујоршката полиција Џесика Тиш. Во 15:17 часот, противпожарната служба на градот добила итен повик дека има хеликоптер во вода, изјави портпарол на противпожарната служба за новинската агенција АФП.

Причините за несреќата се истражуваат. Според сведок цитиран од Ен-Би-Си 4, пред падот се откачилo сечило на роторот на леталото.

Реката Хадсон го дели Њујорк од Њу Џерси и е фреквентен транспортен пат. Во 2009 година, авион на УС Ервејс принудно слета на реката. Преживеаја сите 155 луѓе во авионот. Инцидентот влезе во историјата како „Чудото од Хадсон“.