Групацијата Маск нуди речиси сто милијарди долари за ОпенАИ
11 февруари 2025
Група инвеститори предводена од технолошкиот милијардер Илон Маск поднесе понуда од речиси 100 милијарди долари за да ја преземе контролата врз развивачот на ЧетГПТ (ChatGPT), ОпенАИ (OpenAI). Понудата од 97,4 милијарди долари (околу 94,4 милијарди евра) била поднесена до бордот на директори на Опен АИ во понеделникот, изјави адвокатот на Маск, Марк Тобероф за „Вол Стрит Журнал".
Понудата е поддржана од компанијата за вештачка интелигенција хАИ (xAI) на Маск, која би можела да се спои со ОпенАИ по договор.
Шефот на ОпенАИ , Сем Алтман, не е импресиониран од понудата.
„Не, благодарам, но ние би го купиле Твитер за 9,74 милијарди долари ако сакате“, напиша тој на онлајн платформата на Маск, X. Технолошкиот милијардер плати околу 44 милијарди долари за X, поранешен Твитер, во 2022 година.
Првично непрофитна, ОпенАИ е во процес на промена на својата структура и трансформирање во профитна компанија. ОпенАИ е основана во 2015 година како непрофитна институција за истражување на вештачката интелигенција. Четири години подоцна, Алтман го создаде ОпенАИ ЛП како профитна подружница за да собере пари од инвеститорите. Софтверската компанија Мајкрософт, меѓу другите, инвестираше милијарди.
Со цел да се спречи конверзијата, Маск сега презема правни мерки против ОпенАИ. Технолошкиот милијардер ја коосноваше компанијата во 2015 година, но ја напушти во 2018 година, пред подемот на ЧетГПТ, во меѓувреме ја основа конкурентската компанија xАИ.
Во тужбата Маск меѓу другото тврди дека бил измамен. Сегашната понуда може да го комплицира овој процес.
Чет-ботот со вештачка интелигенција ЧетГПТ пред две години предизвика голема возбуда околу вештачката интелигенција - со очекувања кои се движат од речиси неограничени можности во дигиталниот свет до стравот од уништување на човештвото.